ایف آئی اے امیگریشن نے کراچی ایئرپورٹ پر کارروائی کے دوران نیب کو15سال سے مطلوب اشتہاری گرفتار کرلیا۔
ترجمان ایف آئی اے کے مطابق ملزم کامران احمد خان یوگنڈا سے کراچی ایئرپورٹ پہنچا تھا جس کا نام سٹاپ لسٹ میں شامل تھا، ملزم نے گرفتاری سے بچنے کیلئے مالٹا کا پاسپورٹ اور ریزیڈنٹ کارڈ استعمال کیا۔
ترجمان کے مطابق ملزم کے خلاف 2010ء میں نیب کراچی میں ریفرنس درج ہوا تھا، ابتدائی تفتیش کے مطابق ملزم یو اے ای فرار ہوگیا تھا، ملزم نے ایجنٹ کی مدد سے 6ہزار امریکی ڈالر کے عوض مالٹا کا پاسپورٹ اور ریزیڈنٹ کارڈ حاصل کیا۔
ترجمان کے مطابق ملزم کی جانب سے پیش کیا جانیوالا پاسپورٹ اور ریزیڈنٹ کارڈ جعلی نکلا ،سفری ریکارڈ کے مطابق ملزم نے کبھی مالٹا کا سفر نہیں کیا تھا۔
ترجمان کے مطابق ملزم کو گرفتار کر کے نیب حکام کے حوالے کردیا گیاہے۔
