وفاقی وزیر خزانہ سینیٹر محمد اورنگزیب آئی ایم ایف اور ورلڈ بینک کے سالانہ اجلاسوں میں شرکت کیلئے امریکہ روانہ ہو گئے۔
ذرائع کے مطابق 6 روزہ دورے کے دوران وزیر خزانہ آئی ایم ایف، ورلڈ بینک، انٹرنیشنل فنانس کارپوریشن اور ملٹی لیٹرل انویسٹمنٹ گارنٹی ایجنسی کے سربراہان سمیت 65 سے زائد ملاقاتیں، ایونٹس، اجلاسوں میں شرکت کریں گے۔
ذرائع کے مطابق سینیٹر محمد اورنگزیب عالمی بینک کے صدر اجے بنگا کی خصوصی دعوت پر مختلف ممالک کے وزرائے خزانہ کے اعزاز میں دیئے گئے عشائیے میں بھی شرکت کریں گے۔وزیر خزانہ جی 24اور مشرق وسطی، شمالی افریقہ اور پاکستان ممالک کے پلیٹ فارم پر آئی ایم ایف کی منیجنگ ڈائریکٹر کرسٹلینا جارجیوا سے بھی ملاقات کریں گے، جہاں وہ بطور کلیدی مقرر خطاب کریں گے۔ ذرائع کے مطابق وزیر خزانہ ایف بی آر کی ڈیجیٹل ٹرانسفارمیشن سے متعلق عالمی بینک کے زیر اہتمام علاقائی رائونڈ ٹیبل میں شرکت کریں گے جس میں مختلف ممالک کے ٹیکس حکام اپنی اصلاحاتی پیشرفت پیش کریں گے۔
وزیر خزانہ ورلڈ اکنامک فورم کے زیر اہتمام ہونے والے 2 بڑے پروگراموں میں بھی شرکت کرینگے جبکہ چین، سعودی عرب، ترکیہ، آذربائیجان اور برطانیہ کے اپنے ہم منصبوں سے ملاقاتیں بھی ان کے شیڈول کا حصہ ہیں۔
ذرائع کے مطابق محمد اورنگزیب وائٹ ہائوس، امریکی محکمہ خزانہ اور اسٹیٹ ڈیپارٹمنٹ کے اعلی حکام سے ملاقاتیں کریں گے جبکہ کانگریس کی فنانشل سروسز کمیٹی کے چیئرمین اور یو ایس پاکستان بزنس کونسل کے عہدیداران سے سرمایہ کاری کے مواقع اور ٹیکس تجاویز پر بھی بات چیت ہوگی۔
ذرائع کے مطابق وزیر خزانہ معروف تھنک ٹینکس اٹلانٹک کونسل اور پیٹرسن انسٹیٹیوٹ آف انٹرنیشنل اکنامکس کا دورہ کریں گے جہاں وہ مختلف سرمایہ کاری فورمز اور سیمینارز میں ملک کے معاشی امکانات پر روشنی ڈالیں گے۔
علاوہ ازیں وزیر خزانہ عالمی کریڈٹ ریٹنگ ایجنسیوں، بین الاقوامی کمرشل بینکوں اور بالخصوص مشرقِ وسطی کے سرمایہ کار بینکوں کے نمائندوں سے بھی ملاقات کریں گے۔
