قومی ایئر لائن کے طیاروں میں فنی خرابیوں کے باعث متعدد پروازیں کئی گھنٹے تاخیر کا شکار ہوگئیں جس سے مسافروں کو شدید پریشانی کا سامنا کرنا پڑا۔
ذرائع کے مطابق گزشتہ 24 گھنٹوں میں فنی خرابیوں کے باعث پی آئی اے کی 11 پروازیں غیر معمولی تاخیر کا شکار رہیں۔
ذرائع کے مطابق اسلام آباد سے دبئی جانے والی پرواز ایئربس طیارے کے ہفتہ وار چیک کی وجہ سے دو گھنٹے تاخیر کا شکار ہوئی، کراچی سے لاہور کی پرواز پی کے 177 اور اسلام آباد سے کراچی کی پرواز پی کے 309 طیاروں کے نوز ویل میں فنی خرابی کے باعث تاخیر سے روانہ ہوئیں۔
کراچی سے سکھر جانیوالی اے ٹی آر پرواز لینڈنگ لائٹس میں خرابی کے باعث ڈیڑھ گھنٹہ تاخیر کا شکار ہوئی جبکہ مدینہ سے ملتان پرواز پی کے 716 طیارے کے پارکنگ بریک میں خرابی کے باعث 3 گھنٹے تاخیر ہوئی۔
اسلام آباد سے کراچی پرواز پی کے 301فنی خرابی کے باعث آدھا گھنٹہ جبکہ کراچی سے ٹورونٹو جانیوالی عالمی پرواز پی کے 783کے بوئنگ طیارے میں ری فیولنگ سسٹم کی خرابی پر کئی گھنٹے تاخیر ہوئی۔
ذرائع کے مطابق طیاروں کے فاضل پرزہ جات کی کمی کے باعث ایک طیارے سے پرزہ نکال کر دوسرے طیارے میں نصب کرکے کام چلایا جارہا ہے۔
ذرائع کے مطابق فلائٹ شیڈول متاثرہونے سے مسافروںکو بھی شدید مشکلات کاسامنا کرنا پڑ رہاہے۔
