وزیراعظم شہباز شریف نے آزاد کشمیر میں معاملات خوش اسلوبی سے حل ہونے پر اظہار اطمینان کرتے ہوئے کہا ہے کہ ہم کشمیریوں کے حقوق کے پہلے بھی محافظ تھے، آئندہ بھی تحفظ کرتے رہیں گے، عوام کے تحفظات دور کئے جائیں گے۔
بدھ کو آزاد کشمیر میں کامیاب مذاکرات کے بعد حکومتی مذاکراتی کمیٹی کے اراکین پرویز اشرف، رانا ثنا اللہ، وفاقی وزراء احسن اقبال، سینیٹر محمد اورنگزیب، سردار یوسف، طارق فضل چودھری، احد چیمہ اور رانا مشہود نے وزیراعظم سے ملاقات کی اور ایکشن کمیٹی سے ہونیوالے مذاکرات سے آگاہ کیا۔
وزیراعظم نے صورتحال پر اطمینان کا اظہار کرتے ہوئے کہا کہ آزاد کشمیر کے مسائل پر ہمیشہ توجہ رہی ہے ،حکومت نے ہمیشہ ترجیحی بنیادوں پر مسائل کو حل کیا ہے۔ انہوں نے کہا کہ کشمیری عوام کی امنگوں کے مطابق ان کی ترقی و خوشحالی کیلئے اقدامات کرتے رہیں گے۔
انہوں نے کہا کہ جوائنٹ ایکشن کمیٹی نے کشمیر کی ترقی و خوشحالی کیلئے معاملہ فہمی کا مظاہرہ کیا جس کیلئے وہ لائق تحسین ہیں،تمام معاملات خوش اسلوبی سے حل ہوئے،کشمیری عوام کے تمام تحفظات کو دور کیا جائے گا۔
انہوں نے کہا کہ عوامی مفاد اور امن ہماری ترجیح ہے، ہم پہلے بھی کشمیری بہن بھائیوں کے حقوق کے محافظ تھے ،آئندہ بھی تحفظ کرتے رہیں گے۔
