طوفان الاقصی آپریشن اور غزہ پر مسلط اسرائیلی جنگ کو 2 سال مکمل ہوگئے۔ سات اکتوبر 2023 سے شروع ہونے والی اسرائیلی نسل کشی میں اب تک 67 ہزار سے زائد فلسطینی شہید اور 1 لاکھ 70 ہزار کے قریب زخمی ہو چکے۔
اسرائیل کے وحشیانہ حملوں میں غزہ کھنڈر بن چکا ہے، اسپتال، مساجد ، گرجا گھر، اسکول کالجز اور تعلیمی اداروں سمیت کچھ سلامت نہیں رہا۔ اسرائیلی فوج نے سویلین انفرااسٹرکچر تباہ کردیا ہے جس سے لاکھوں شہری بے گھر ہوچکے ہیں۔
اسرائیلی ناکہ بندی سے بیس لاکھ افراد فاقہ کشی پر مجبور ہیں۔ اسرائیل اعداد وشمار کے مطابق اب تک اس کے 1152 فوجی ہلاک ہو چکے ہیں۔یاد رہے حماس کے اکتوبر 2023 کے حملے میں اسرائیلیوں سمیت 1 ہزار 219 افراد مارے گئے تھے۔ دو سو اکیاون اسرائیلی گرفتار کئے گئے تھے۔
جنگ اور تمام تر کوششوں کے باوجود اسرائیل حماس کی قید سے 48 قیدی رہا نہیں کرا سکا جس میں سے 20 کے بارے میں خیال ہے کہ وہ زندہ ہیں۔
غزہ میں جنگ بندی کے لیے اسرائیل سمیت دنیا بھر میں مظاہرے اور احتجاج کا سلسلہ بھی جاری ہے۔ علاوہ ازیں اسرائیل نے ایران، قطر، لبنان، شام اور یمن پر بھی حملے کئے۔
