وزیراعظم شہباز شریف نے کہا ہے کہ پاکستان اور ملائیشیا کے درمیان اقتصادی و تجارتی شعبوں میں تعاون بڑھانے کی وسیع گنجائش ہے، حکومت پاکستان سرمایہ کاری میں سہولت کیلئے اصلاحات پر توجہ مرکوز کئے ہوئے ہے،آئی ٹی،ٹیک ،اے آئی شعبوں میں وسیع استعداد کو مد نظر رکھ کر متعلقہ عالمی کاروباری اداروں و سرمایہ کاروں کا خیر مقدم کریں گے۔
جاری بیان کے مطابق وزیراعظم شہباز شریف سے ملائیشیا کے بزنس گروپ گوبی پارٹنرز کے وفد نے کو فائونڈراور چیئرتھامس ساکی کی قیادت میں ملاقات کی۔
اس موقع پر نائب وزیراعظم و وزیر خارجہ اسحاق ڈار، وفاقی وزیر تجارت جام کمال خان، وفاقی وزیر قومی غذائی تحفظ و تحقیق رانا تنویر حسین، وفاقی وزیر اطلاعات عطا اللہ تارڑ، وزیراعظم کے معاون خصوصی طارق فاطمی اور متعلقہ اعلی سرکاری افسران بھی موجود تھے۔
ملاقات کے دوران گوبی پارٹنرز کے وفد نے پاکستان میں ای-کامرس اور فنانشل ٹیکنالوجیز کے شعبے میں اشتراک میں گہری دلچسپی کا اظہار کیا۔
وزیر اعظم نے کہا کہ پاکستان اور ملائیشیاکے درمیان اقتصادی اور تجارتی شعبوں میں تعاون بڑھانے کی بہت استعداد موجود ہے جس کیلئے دونوں فریقین بھرپور کام کر رہے ہیں، دونوں ممالک کی درمیان بزنس ٹو بزنس روابط بڑھانے کے حوالے سے گزشتہ روز پاکستان ملائیشیابزنس اینڈ انویسٹمنٹ کانفرنس کا انعقاد انتہائی خوش آئند ہے۔
وزیراعظم نے کہا کہ ہم کاروبار کیلئے دوستانہ ماحول بنانے اور کاروبار کرنے میں آسانی کو بہتر بنانے کیلئے پرعزم ہیں،خصوصی سرمایہ کاری سہولت کونسل بیرونی سرمایہ کاروں کو ہر قسم کی سہولیات کی فراہمی کیلئے کوشاں ہے ۔
انہوں نے کہا کہ پاکستان کے سٹارٹ اپ ایکو سسٹم پر گوبی پارٹنرز کا اعتماد خوش آئند ہے،حکومت پاکستان سرمایہ کاری سہولت اور بنیادی ڈھانچے تک بہتر رسائی کے ذریعے سٹارٹ اپس اور ابتدائی مرحلے کے سرمایہ کاروں کی مدد کیلئے مرکوز اصلاحات پر کام کر رہی ہے۔
وزیراعظم نے کہا کہ ایک پائیدار ٹارٹ اپ ماحولیاتی نظام کی تعمیر کیلئے عالمی اور ملکی سرمایہ کو راغب کرنا ہماری ترجیح ہے، ڈیجیٹل معیشت خاص طور پر فن ٹیک، ای کامرس اور آئی ٹی خدمات ہماری قومی ترقی کی حکمت عملی میں مرکزی حیثیت رکھتی ہے۔
وزیراعظم نے کہا کہ ہم پاکستان کے آئی ٹی، ٹیک اور اے آئی شعبوں میں وسیع استعداد کو مد نظر رکھتے ہوئے متعلقہ عالمی بزنس گروپس اور سرمایہ کاروں کا خیر مقدم کریں گے۔
