مشیر اطلاعات خیبرپختونخوا بیرسٹر سیف نے کہا ہے کہ خیبر پختونخوا حکومت عوام کو باوقار ،معیاری صحت سہولیات فراہمی کیلئے پرعزم ہے، صحت کارڈ پلس خدمت، تحفظ اور شفاء کی ضمانت ،لاکھوں خاندان استفادہ حاصل کررہے ہیں۔
اپنے بیان میں بیرسٹر سیف نے کہا کہ خیبرپختونخوا حکومت کے ڈیڑھ سالہ عرصہ میں 16لاکھ 70ہزار سے زائد مریضوں کو مفت علاج فراہم کیا جا چکا ہے، عوام کو صحت کی مفت سہولیات کی فراہمی پر مجموعی طور پر 57ارب روپے خرچ کئے گئے ہیں، 276مریضوں کو ٹرانسپلانٹ اور کاکلیئر امپلانٹ کی سہولت فراہم کی جا چکی ہے۔انہوں نے بتایا کہ خیبر پختونخوا کے 158ہسپتالوں کیساتھ ملک بھر کے 700ہسپتالوں میں مفت علاج کی سہولت دستیاب ہے، صحت کارڈ پلس کے تحت گردے اور جگر کی پیوندکاری، بون میرو ٹرانسپلانٹ سمیت دیگر مہنگے امراض کا علاج مفت فراہم کیا جا رہا ہے۔
انہوں نے کہا کہ ژوندون کارڈ کے ذریعے مردان میں او پی ڈی مریضوں کو مفت ادویات کی فراہمی کا آغاز بھی ہو چکا ہے جسے جلد صوبے کے دیگر اضلاع تک توسیع دی جائے گی۔
انہوں نے کہا کہ خیبر پختونخوا حکومت عوام کو باوقار اور معیاری صحت سہولیات فراہم کرنے کیلئے پرعزم ہے، صحت کارڈ پلس حقیقی معنوں میں عوامی فلاح و بہبود کا منصوبہ ہے، حکومت خیبرپختونخوا کا انقلابی منصوبہ عوام کی خدمت، تحفظ اور شفاء کی ضمانت ہے جس سے لاکھوں خاندان استفادہ حاصل کررہے ہیں۔
