جماعت اسلامی نے فلسطینی عوام، حماس کے فیصلوں کا بھرپور ساتھ دینے کا اعلان کرتے ہوئے سوال اٹھایا ہے کہ حکومت دبائو کا شکار، پی ٹی آئی امریکہ کی مذمت، حماس کی حمایت سے کیوں گریزاں ہے؟، سوال قوم کے ذہنوں میں گونج رہا ہے۔
جاری بیان میں نائب امیر جماعت اسلامی لیاقت بلوچ نے کہا کہ لاہور اور کراچی کے عوام نے فلسطینیوں سے جس فقید المثال انداز میں یکجہتی کا اظہار کیا ہے وہ قابل تحسین ہے،پاکستانی عوام نہاد ٹرمپ امن منصوبے کو مکمل طور پر مسترد اور فلسطینیوں کے حق میں اپنے مو قف کو واضح کر دیا ہے۔
انہوں نے کہا کہ ہم فلسطینی عوام اور حماس کے فیصلوں کا بھرپور ساتھ دیں گے۔ انہوں نے کہا کہ بدقسمتی سے موجودہ حکومت امریکہ کی مذمت کرنے سے قاصر ہے ،اس پر دبائو یا مجبوری صاف نظر آتی ہے، لیکن اپوزیشن میں موجود پی ٹی آئی امریکہ کی مذمت اور حماس کی حمایت کیوں نہیں کرتی؟، یہ سوال پوری قوم کے ذہنوں میں گونج رہا ہے۔
انہوں نے کہا کہ وفاقی اور صوبائی حکومتوں پر لازم ہے کہ وہ سیلاب متاثرین کی بحالی کو قومی فریضہ سمجھ کر اپنی ذمہ داریاں نبھائیں۔ پنجاب، سندھ اور خیبر پختونخوا کی حکومتوں کی باہمی نورا کشتی کا نقصان براہ راست سیلاب متاثرین کو ہو رہا ہے، جنہیں امداد سے محروم رکھا جا رہا ہے۔
انہوں نے مطالبہ کیا کہ پنجاب، اسلام آباد اور کوئٹہ کے عوام کو فوری طور پر بلدیاتی حقوق فراہم کئے جائیں تاکہ مقامی سطح پر مسائل کا حل ممکن ہو سکے۔
