پاکستان نے اسرائیل کی جانب سے گلوبل صمود فلوٹیلا روکنے کی مذمت کرتے ہوئے سوار کارکنان کی گرفتاری کو عالمی قانون کی خلاف ورزی قرار دیتے ہوئے فوری رہائی کا مطالبہ کیا ہے۔
دفتر خارجہ کی جانب سے جاری بیان میں کہا گیا ہے کہ اسرائیل کی مسلسل جارحیت اور غیر قانونی ناکہ بندی سے 20لاکھ فلسطینی متاثر ہیں، انسانی امداد روکنا اسرائیل کی بطور قابض قوت ذمہ داریوں کی سنگین خلاف ورزی ہے۔
بیان میں کہا گیا ہے کہ فلوٹیلا میں 40سے زائد سول جہاز اور 500عالمی کارکن شامل تھے جو غزہ کے محصور عوام کیلئے انسانی امداد لے جا رہے تھے، اسرائیل کی کارروائی بے گناہ شہریوں کی زندگیاں خطرے میں ڈالنے کے مترادف ہے۔
بیان میں کہا گیا ہے کہ پاکستان فوری و غیر مشروط جنگ بندی ،غزہ کی غیر قانونی ناکہ بندی کے خاتمے اور فلوٹیلا پر سوار تمام کارکنان و رضا کاروں کو فوری رہائی کا مطالبہ کرتا ہے۔ترجمان نے کہا کہ اسرائیل کو بار بار کی خلاف ورزیوں پر جوابدہ ٹھہرایا جانا چاہئے، پاکستان فلسطینی عوام سے غیر متزلزل حمایت اور یکجہتی کا اعادہ کرتا ہے اور 1967ء سے پہلے کی سرحدوں پر مبنی آزاد و خودمختار فلسطینی ریاست کے قیام پر زور دیتا ہے جس کا دارالحکومت القدس الشریف ہونا چاہئے۔
