قائم مقام صدر مملکت سید یوسف رضا گیلانی نے واضح کیا ہے کہ اسرائیل بارے کوئی فیصلہ نہیں کیا، اتحادی ممالک کیساتھ مل کر چل رہے ہیں، وزیراعظم پارلیمنٹ کو اعتماد میں لیں گے، ملک کو آگے لے جانے کیلئے مل کر کام کرنا ہوگا۔پشاور میں پریس کانفرنس کرتے ہوئے یوسف رضا گیلانی نے کہا کہ پاکستان برسوں سے افغان پناہ گزینوں کی میزبانی کر رہا ہے، خارجہ پالیسی وفاق کا معاملہ ہے، بلاول بھٹو نے بطور وزیر خارجہ اچھی کارکردگی دکھائی، وہ جوان لیڈر ہیں فارن منسٹری میں مو ثر کام کیا ہے۔
انہوں نے کہا کہ سینیٹ میں جو بھی آئین سازی ہوتی ہے باہمی اتفاق رائے سے کرتا ہوں، ملک کو آگے لے جانے کیلئے مل کر کام کرنا ہوگا، ہم نے آئینی ترامیم کر کے پارلیمنٹ کو مضبوط کیا ہے ۔انہوں نے کہا کہ ہم آئین کے مطابق چلیں گے تو اس میں کوئی تضاد نہیں ہوگا، امن و امان کی صورتحال پر سوچنا ہماری اجتماعی ذمہ داری ہے۔
انہوں نے کہا کہ اختلاف رائے جمہوریت ہے، آئین کے مطابق کام کریں گے۔ قائم مقام صدر نے واضح کیا کہ ہم نے اسرائیل کے حوالے سے کوئی فیصلہ نہیں کیا، ہم اتحادی ممالک کیساتھ ملکر چل رہے ہیں، وزیراعظم اور فیلڈ مارشل امریکا گئے ہیں، یہ صرف اکیلے وزیراعظم کا فیصلہ نہیں ہوتا، وزیراعظم پارلیمنٹ کو اعتماد میں لیں گے۔
انہوں نے کہا کہ ہم نے اپنے دور میں آپریشن کیا اور 90روز کے اندر لوگوں کو اپنے گھر بھیجا، ہم صوبوں کو حقوق دینے کے حق میں ہیں، نئے صوبوں کا طریقہ کار آئین میں ہے۔
