اسلام آباد: اسلام آباد انتظامیہ نے پی ٹی آئی کو 8 ستمبر کو جلسہ کرنے کی اجازت دیتے ہوئے نوٹیفکیشن جاری کردیا۔ تفصیلات کے مطابق اسلام آباد انتظامیہ نے پی ٹی آئی کو 8 ستمبر کو اسلام آباد میں جلسہ کرنے کی اجازت دے دی ہے۔
ڈسٹرکٹ مجسٹریٹ کی جانب سے 40 ہدایات کیساتھ جاری نوٹیفکیشن میں کہا گیا ہے کہ پی ٹی آئی کا آج 22 اگست کااین او سی مذہبی جماعتوں کے احتجاج کی وجہ سے منسوخ کیا گیا ہے۔
ڈسٹرکٹ مجسٹریٹ اسلام آباد نے کہا ہے کہ 8 ستمبر کو انتظامیہ جلسے کو سیکیورٹی فراہم کرے گی، جلسہ کرنیوالے افراد کسی بھی شہری کے بنیادی حقوق کو متاثر نہیں کریں گے،لوگ شام 4 بجے اکٹھے ہوں گے اور 7 بجے جلسہ ختم کرنا ہو گا۔
نوٹیفکیشن کے مطابق جلسہ انتظامیہ کی ڈیوٹی ہوگی کہ جلسہ ختم کرنے کے بعد کارکنوں کو منتشر کیا جائے، 8 ستمبر کو کارکنوں کو جلسہ گاہ میں بیٹھنے کی اجازت نہیں ہو گی۔
