راولپنڈی میں ڈینگی بے قابو ہوگیا، گزشتہ 24 گھنٹوں میں مزید 20 افراد وائرس کا شکار ہوگئے۔ محکمہ صحت کے اعداد و شمار کے مطابق شہر میں اب تک مجموعی طور پر 11ہزار 93 افراد کی سکریننگ کی جا چکی ہے جن میں سے 676 افراد میں ڈینگی کی تصدیق ہوئی۔
حکام کے مطابق تاحال ڈینگی کے 51 کنفرم مریض مختلف ہسپتالوں میں زیر علاج ہیں، رواں برس ڈینگی سے کوئی ہلاکت رپورٹ نہیں ہوئی۔
حکام کے مطابق ڈینگی سرویلنس کیلئے تشکیل دی گئی 1499 ٹیموں نے اب تک 53 لاکھ 85ہزار 385 گھروں کی چیکنگ کی ہے، اس دوران 14لاکھ 51ہزار 737مقامات کا معائنہ کیا گیا جن میں سے 21ہزار 802 مقامات پازیٹو نکلے۔ حکام کے مطابق ایک لاکھ 83ہزار 813جگہوں پر ڈینگی لاروا برآمد ہوا جسے فوری طور پر تلف کردیا گیا۔
حکام نے بتایا کہ ڈینگی ایس او پیز کی خلاف ورزی پر اب تک 4301مقدمات درج کئے جاچکے ہیں۔
