اسلام آباد ہائیکورٹ نے بیوی ،بچوں کیلئے 75ہزار روپے ماہانہ نان و نفقہ کے عدالتی فیصلے کیخلاف درخواست مسترد کر دی۔
بدھ کو اسلام آباد ہائیکورٹ میں جسٹس محمد اعظم خان نے گارڈین جج کے عبوری فیصلے کیخلاف کیس پر سماعت کی ۔درخواست گزار نے موقف اپنایا کہ اہلیہ نافرمان ہے، ازدواجی حقوق کی بحالی کیلئے بار بار درخواست کی ،اہلیہ ازدواجی ذمہ داریاں نبھانے کیلئے شوہر کا ساتھ نہ دے تو کسی قسم کے نان و نفقہ کی حقدار نہیں۔
عدالت نے موقف سننے کے بعد گارڈین جج کا فیصلہ برقرار رکھتے ہوئے پٹیشنر کو نان و نفقہ کی ادائیگی کی ہدایت کر دی۔عدالت نے فیصلے میں لکھا کہ شوہر نے پٹیشن میں اہلیہ سے متعلق جس طرح کے الفاظ کا استعمال کیا وہ اس کی بدنیتی ظاہر کرتے ہیں، فیملی جج کے 6مارچ 2025 کے آرڈر میں کوئی بے قاعدگی یا غیر قانونی بات نہیں۔
واضح رہے کہ گارڈین جج اسلام آباد نے اہلیہ کیلئے 15ہزار اور 2بچوں کیلئے 30ہزار روپے فی کس ماہانہ خرچہ دینے کا عبوری حکم دیا تھا۔
