خضدار میں سیکیورٹی فورسز کے آپریشن کے دوران فتنہ الہندوستان کے 7 دہشت گرد جہنم واصل جبکہ 10 زخمی ہوگئے۔
سیکیورٹی ذرائع کے مطابق خضدار کے علاقے زہری کے ملحقہ پہاڑوں میں فتنہ الہندوستان کی موجودگی اور نقل و حرکت کی خفیہ اطلاعات تھیں ،دہشت گرد مقامی لوگوں کو بھی ہراساں کررہے تھے جس پرسیکیورٹی فورسز نے ہیلی کاپٹرز کا استعمال کرتے ہوئے آپریشن کیا، اس دوران فتنہ الہندوستان کے 7دہشت گرد ہلاک جبکہ 10زخمی ہوگئے۔
سیکیورٹی ذرائع کے مطابق ہلاک دہشت گردوں کے قبضے سے تیار شدہ آی ای ڈیز، ٹرانسمیٹرز، امریکی ساختہ خودکار ہتھیار، گرینیڈ، گولیاں اور موٹر سائیکلیں برآمد ہوئیں ہیں۔ذرائع کے مطابق سیکیورٹی فورسز نے فتنہ الہندوستان کی طرف سے بدوکشت کے مرکزی پل پر نصب کی گئی بڑی آئی ای ڈی کو کامیابی سے ناکارہ بنایا۔
ذرائع کے مطابق سیکیورٹی فورسز نے زہری اور بلوچستان میں بھارتی ایما پر تخریبی کارروائیوں میں ملوث فتنہ الہندوستان کے خاتمے تک آپریشن جاری رکھنے کے عزم کا اعادہ کیاہے۔
