پاکستان شوبز انڈسٹری کی معروف اداکارہ عائزہ خان کے بھائی احد کی مبینہ سابقہ منگیتر عروبہ طارق نامی خاتون نے کہا ہے کہ عائزہ کا بھائی احد دھوکے باز ہے، ان کا خاندان بھی سچائی سے دور ہے، وہ اپنے گھریلو ملازمین کے ساتھ بھی اچھا سلوک نہیں کرتے، اسی وجہ سے وہاں ملازم زیادہ دیر نہیں ٹھہرتے۔
سوشل میڈیا پر وائرل اسکرین شاٹس میںعروبہ طارق نے دعویٰ کیا ہے کہ وہ اور احد ایک دوسرے کو پسند کرتے تھے اور احد نے ہی انہیں شادی کی پیشکش کی تھی۔ ان کے مطابق شادی کی تیاریاں بھی شروع ہو چکی تھیں، لیکن بعد ازاں رشتہ ختم ہو گیا۔
انہوں نے مزید کہا کہ عائزہ خان اپنے پورے خاندان پر حاوی ہیں اور ہر فیصلہ ان کی مرضی کے مطابق ہوتا ہے۔ عروبہ کے بقول، عائزہ کے بھائی کی تعلیم گریجویشن تک بھی مکمل نہیں، مگر اس نے انہیں جھوٹ بول کر کہا کہ وہ بزنس گریجویٹ ہے، حالانکہ وہ خود کچھ نہیں کماتا اور بہن پر انحصار کرتا ہے۔
عروبہ طارق نے یہ الزام بھی لگایا کہ احد کا ماضی میں اداکارہ سارہ خان سے تعلق رہا ہے۔ ان الزامات کے بعد سارہ خان اور احد کی پرانی تصاویر بھی سوشل میڈیا پر زیرِ گردش ہیں۔
