لاہور ہائی کورٹ نے کم عمر بچوں کے سوشل میڈیا استعمال پر پابندی کی درخواست پر پی ٹی اے سمیت دیگر فریقین کو نوٹس جاری کر کے جواب طلب کرلیا۔ منگل کو لاہور ہائیکورٹ میں چیف جسٹس عالیہ نیلم نے شہری اعظم بٹ کی درخواست پر سماعت کی۔
وکیل درخواست گزار نے موقف اپنایا کہ بچے فیس بک اور ٹک ٹاک پر نامناسب مواد دیکھتے ہیں جس سے بچوں کی تعلیمی سرگرمیاں متاثر ہورہی ہیں۔ چیف جسٹس نے کہا کہ سوشل میڈیا پر سسٹم موجود ہے کہ بچوں کی رسائی کو محدود کر سکتے ہیں۔
والدین بچوں کے سوشل میڈیا تک رسائی کو چیک کر سکتے ہیں، بیرون ملک بھی والدین ایسی ہی رسائی رکھتے ہیں ۔چیف جسٹس نے ایڈیشنل اٹارنی جنرل سے استفسار کیا کہ آپ اس پر کیا کہیں گے؟ جس پر سرکاری وکیل نے جواب دیا کہ انہوں نے پٹیشن میں فریق ہی غلط بنایا ہے، حکومت پاکستان کو فریق بنانا چاہئے تھا۔
چیف جسٹس نے کہا کہ اگر انہوں نے پی ٹی اے کو درخواست دی ہے تو ان سے پتا کر کے عدالت کو آگاہ کریں۔ کمیشن کا مقصد یہی ہے کہ لوگوں کے معاملات کو حل کرنے کیلئے ان سے رابطہ کر سکیں۔ بعد ازاں عدالت نے پی ٹی اے سمیت دیگر فریقین کو نوٹس جاری کرتے ہوئے جواب طلب کرلیا۔
