حکومت پنجاب نے تمام ہائوسنگ سوسائٹیز کے ہر گھر و پلازہ میں سیپٹک ٹینک بنانا لازمی قرار دے دیا۔ جاری بیان میں ڈی جی ادارہ تحفظ ماحولیات پنجاب عمران حامد شیخ نے کہا ہے کہ پنجاب کی تمام ہائوسنگ سوسائٹیز کو ڈوئل واٹر مینجمنٹ اپنانے کی ہدایت کی گئی ہے، ہر گھر کے ساتھ تین خانوں والا سیپٹک ٹینک بنایا جائے گا جبکہ سوسائٹی کی سطح پر بھی ایک ٹریٹمنٹ پلانٹ لگایا جائے گا، تحقیق سے پتا چلا ہے کہ تین خانوں والے سیپٹک ٹینک پانی میں موجود 70فیصد گندے ذرات اور 40فیصد آلودگی کم کرنے کی صلاحیت رکھتے ہیں۔
انہوں نے کہا کہ فیصلے کا مقصد زیر زمین پانی اور آبی ذخائر کو گندے پانی سے بچانا ہے کیونکہ بغیر علاج کے چھوڑا جانے والا سیوریج پانی آلودگی پھیلا رہا ہے اور اس سے پانی کے ذریعے پھیلنے والی بیماریوں کا خطرہ بڑھ رہا ہے۔
انہوں نے بتایا کہ گھروں اور پلازوں کیلئے سیپٹک ٹینک کے سائز بھی طے کر دیئے گئے ہیں۔ پانچ مرلہ گھر کیلئے 6فٹ لمبا، 4فٹ چوڑا اور 4فٹ اونچا ٹینک ہوگا۔ دس مرلہ گھر کیلئے 9فٹ لمبا، 6فٹ چوڑا اور 4فٹ اونچا، ایک کنال کے پلازے کیلئے 10فٹ لمبا، 6فٹ چوڑا اور 5فٹ اونچا، تین سے چار کنال کے پلازوں کیلئے 15فٹ لمبا، 6فٹ چوڑا اور 5فٹ اونچا جبکہ چار کنال سے زائد بڑے پلازوں کیلئے 16فٹ لمبا، 6فٹ چوڑا اور 5فٹ اونچا ٹینک لازمی ہوگا۔
انہوں نے بتایا کہ نئی ہائوسنگ سوسائٹیز کو ماحولیاتی منظوری صرف اسی صورت میں ملے گی جب وہ سیپٹک ٹینک کی شرط پوری کریں گی، اس بارے میں ایل ڈی اے، ایف ڈی اے، جی ڈی اے، آر ڈی اے سمیت تمام اداروں کو ہدایت نامے جاری کر دیئے گئے ہیں، ڈپٹی کمشنرز کو بھی ہدایت کی گئی ہے کہ زمین کی تقسیم کے وقت فیصلے پر سختی سے عمل کرایا جائے۔
ڈی جی کے مطابق جوڈیشل واٹر اینڈ انوائرمنٹ کمیشن اور دیگر اداروں کو بھی اس بارے آگاہ کر دیا گیا ہے۔ ای پی اے کے فیلڈ افسران کو ہائوسنگ سوسائٹیز میں سیپٹک ٹینک کی تنصیب پر کڑی نظر رکھنے کی ہدایت کی گئی ہے۔
