اسلام آباد : وزیراعظم شہباز شریف نے اسرار خان کاکڑ کو آکسفورڈ یونیورسٹی میں یونین کا صدر بننے پر مبارکباددیتے ہوئے کہا ہے کہ امید ہے باصلاحیت پاکستانی نوجوان ایسے ہی عالمی سطح پر ملک کا نام روشن کرتے رہیں گے، پاکستان ایجوکیشن انڈوومنٹ فنڈ کا قیام عمل میں آچکا،غریب گھرانوں کے بچے بھی اب اعلیٰ تعلیم حاصل کر سکیں گے۔
تفصیلات کے مطابق وزیراعظم سے پاکستان سے تعلق رکھنے والے آکسفورڈ یونین کے نو منتخب صدر اسرار خان کاکڑ نے ملاقات کی،شہباز شریف نے وزیراعظم ہاؤس آمد پراسرار خان کا خیر مقدم کیا اور بیرون ملک پاکستان کا نام روشن کرنے پر سراہا۔
وزیراعظم نے انہیں آکسفورڈ یونین کا صدر بننے پر مبارکباد پیش کرتے ہوئے کہا کہ اسرار کاکڑ جیسے باصلاحیت نوجوان ہی پاکستان کے پائیدار اور روشن مستقبل کے ضامن ہیں، آپ کا آکسفورڈ یونین کے صدر کا الیکشن لڑنا اور سرخرو ہونا آپ کی ثابت قدمی اور غیر متزلزل عزم کا عکاس ہے۔
انہوں نے کہا کہ پر امید ہوں اسرار کاکڑ اور ان جیسے باصلاحیت پاکستانی نوجوان ایسے ہی بین الاقوامی سطح پر ملک کا نام روشن کرتے رہیں گے۔
انہوں نے کہا کہ بلوچستان کے پسماندہ علاقے سے تعلق رکھنے والے نوجوان کا انتھک محنت سے اپنے تمام تعلیمی مراحل میں وظائف حاصل کرنا اور بالآخر آکسفورڈ یونین جیسی اعلیٰ تنظیم کا صدر منتخب ہونا قابل فخر ہے۔ انہوں نے کہا کہ پاکستان ایجوکیشن انڈوومنٹ فنڈ کا قیام عمل میں آچکا ہے جس کی بدولت غریب گھرانوں کے بچے اعلیٰ تعلیم حاصل کر سکیں گے، پاکستان ایجوکیشن انڈوومنٹ فنڈ میں بلوچستان کے نوجوانوں کیلئے 20 فیصد کوٹہ مختص کیا گیا ہے۔
اسرارخان کاکڑ نے وزیراعظم کو آکسفورڈ یونین سے خطاب کرنے کی دعوت دیتے ہوئے کہا کہ وزیر اعظم کے نوجوانوں کو بااختیار بنانے اور انہیں یکساں ترقی کے مواقع فراہم کرنے کے اقدامات پر خراجِ تحسین پیش کرتا ہوں۔ انہوں نے کہا کہ مجھ سمیت پاکستان کے تمام نوجوان پاکستان کی ترقی و خوشحالی کیلئے ہر طرح کی خدمات کیلئے تیار ہیں۔
