پی ڈی ایم اے خیبرپختونخوا نے صوبے میں 19ستمبر تک بارشوں کے پیش نظر الرٹ جاری کردیا۔ جاری بیان میں کہا ہے کہ محکمہ موسمیات کے مطابق خیبرپختونخوا کے مختلف علاقوں میں 19 ستمبر تک وقفہ وقفہ سے بارشوں، آندھی، گرج چمک اور بعض مقامات پر موسلادھار بارشوں کا امکان ہے۔
ترجمان کے مطابق 16 تا 19 ستمبر کے دوران صوبہ کے بالائی اضلاع دیر (بالائی و زیریں)، چترال (بالائی و زیریں)، سوات، کوہستان (بالائی و زیریں)، کولئی پالس، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ، باجوڑ، مہمند، کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، شمالی و جنوبی وزیرستان میں وقفہ وقفہ سے گرج چمک کے ساتھ تیز آندھی اور بارش کا امکان ہے جس سے مقامی نالوں/دریائوں میں پانی کے بہائو میں اضافے اور لینڈ سلائیڈنگ کا خدشہ ہے۔
بیان میں کہا گیا ہے کہ تیز ہوائوں اور گرج چمک کے باعث کمزور مکانات، بجلی کے کھمبے، اشتہاری بورڈز اور سولر پینلز کو نقصان پہنچ سکتا ہے،اس سلسلہ میں تمام ضلعی انتظامیہ کو ضروری احتیاطی اقدامات، نکاسی آب کے نظام کی صفائی اور مقامی آبادی، سیاحوں اور مسافروں کو بروقت آگاہی فراہم کرنے کی ہدایات دی گئی ہیں۔
پی ڈی ایم اے نے کاشتکاروں، مویشی پال حضرات اور سیاحوں کو فصلوں اور جانوروں کو محفوظ مقامات پر منتقل کرنے جبکہ سیاحوں کو خطرناک مقامات پر جانے سے گریز کی ہدایت کی ہے۔
