اسلام آباد: پاکستان میں بارشوں، سیلاب اور بھارتی آبی جارحیت کے باعث 4700 موضع جات اور 45 لاکھ 70 ہزار افراد متاثر جبکہ مختلف حادثات میں ہلاک شہریوں کی تعداد 101 ہوگئی۔
پی ڈی ایم اے پنجاب کی جانب سے جاری رپورٹ میں ریلیف کمشنر پنجاب نبیل جاوید نے بتایا ہے کہ دریائے چناب میں سیلاب سے 2489 موضع جات، دریائے ستلج سے 701 موضع اور دریائے راوی سے 1458 موضع جات متاثر ہوئے ہیں۔
ریلیف کمشنر نے بتایا کہ سیلاب سے مجموعی طور پر 45لاکھ 70ہزار لوگ متاثر ہوئے جن میں سے سیلاب میں پھنسے 25لاکھ 12ہزار لوگوں اور 20لاکھ 19ہزار جانوروں کو محفوظ مقامات پر منتقل کیا گیا۔انہوں نے بتایا کہ اب تک سیلاب کے باعث مختلف حادثات میں 101 شہری جاں بحق ہوچکے ہیں۔
انہوں نے بتایا کہ شدید سیلاب متاثرہ اضلاع میں 392ریلیف جبکہ 493میڈیکل کیمپس بھی قائم کیے گئے ہیں، مویشیوں کو علاج معالجے کی سہولت فراہم کرنے کے لیے 422ویٹرنری کیمپس کام کررہے ہیں۔
انہوں نے بتایا کہ منگلا ڈیم 93فیصد جبکہ تربیلا ڈیم 100فیصد تک بھر چکا ہے، دریائے ستلج پر موجود انڈین بھاکڑا ڈیم 88فیصد ، پونگ ڈیم 94فیصد جبکہ تھین ڈیم 89فیصد تک بھر چکا ہے۔ انہوں کہا کہ وزیر اعلی پنجاب کی ہدایات کے پیش نظر شہریوں کے نقصانات کا ازالہ کیا جائے گا۔
