لاہور: وزیر اطلاعات پنجاب عظمی بخاری نے کہا ہے کہ سیاست کیلئے سیلاب کا استعمال نا مناسب ہے، ہٹ دھرمی کی بجائے غلطی کوٹھیک کرتے ہیں، متاثرین کو سہولیات فراہمی جاری ہے، سیلاب سے متاثرہ علاقوں میں نجی کشتیوں کو ریگولیٹ کیا جائے گا۔
لاہور میں پریس کانفرنس کرتے ہوئے عظمی بخاری نے بتایا کہ ہیڈ محمد والا اور شیر شاہ میں حالات قابو میں ہیں، ٹینیککل کمیٹی نے ہیڈ محمد والا اور شیر شاہ کو بچانے کیلئے کہیں شگاف ڈالنے کا فیصلہ نہیں کیا، پنجاب حکومت ہٹ دھرمی کا مظاہرہ نہیں کرتی، جہاں غلطی ہوتی ہے اسے ٹھیک کرتی ہے۔
انہوں نے کہا کہ ملتان میں 139کشتیاں ریسکیو کے عمل میں مصروف ہیں،گزشتہ روز ایک پرائیویٹ کشتی چلانے کا واقعہ سامنے آیا، پرائیویٹ کشتی مالک سیلاب زدگان کو محفوظ مقام پر منتقل کرنے کیلئے پیسے مانگ رہا تھا،ناقص انتظامات پر اسسٹنٹ کمشنر جلال پور پیر والا کو عہدے سے ہٹا دیا گیا ہے۔
انہوں نے بتایا کہ سیلاب سے متاثرہ علاقوں میں نجی کشتیوں کو ریگولیٹ کیا جائے گا، نجی کشتیوں کو ادائیگی حکومت کرے گی۔ انہوں نے بتایا کہ سیلاب سے 4572دیہات اور 42لاکھ افراد متاثر ہوئے ہیں اب تک 22لاکھ افراد کو محفوظ مقام پر منتقل کیا گیا، 490میڈیکل کیمپس اور 412وٹنری کیمپ متاثرین کو سہولیات فراہم کررہے ہیں۔ انہوں نے کہا کہ پنجاب سخت ترین آفت سے لڑ رہا ہے، سیاست کیلئے سیلاب کو استعمال کرنا نا مناسب ہے۔ ۔
