اسلام آباد: وزیراعظم شہباز شریف نے پاکستان اور بنگلہ دیش کے درمیان عوامی روابط، علمی تبادلوں، تجارتی و اقتصادی سمیت دوطرفہ تعلقات کی مثبت سمت پر اطمینان کا اظہار کیا ہے۔
جاری بیان کے مطابق جمعرات کو وزیراعظم شہباز شریف سے بنگلہ دیش کے مشیر مذہبی امور ڈاکٹر اے ایف ایم خالد حسین نے وفد کے ہمراہ ملاقات کی ، اس موقع پر پاکستان میں بنگلہ دیش کے ہائی کمشنر محمد اقبال حسین خان بھی موجود تھے۔
ملاقات میں دوطرفہ تعلقات بڑھانے، دونوں ممالک کے درمیان براہ راست پروازوں کی جلد بحالی کے امکانات پر تبادلہ خیال کیا گیا۔ وزیراعظم نے کہا کہ پاکستان اور بنگلہ دیش کے درمیان دوطرفہ تعلقات مشترکہ تاریخ، ثقافتی روابط اور گہری وابستگیوں پر مبنی ہیں۔
وزیراعظم نے عوامی روابط، علمی تبادلوں، تجارتی اور اقتصادی تعلقات سمیت دوطرفہ تعلقات کی مثبت سمت پر اطمینان کا اظہار کرتے ہوئے تعلقات کے مزید فروغ پر زور دیا۔وزیراعظم نے بنگلہ دیشی چیف ایڈوائزر پروفیسر محمد یونس کی دور اندیش قیادت ،غربت خاتمے میں کردار اور پاکستان کیساتھ تعلقات کو مضبوط بنانے کی خواہش کو سراہا۔
وزیراعظم نے امید ظاہر کی کہ دونوں ممالک دوطرفہ تعلقات میں موجودہ رفتار کو برقرار رکھنے کیلئے اعلی سطح کے دوروں کا تبادلہ جاری رکھیں گے۔وزیراعظم نے بنگلہ دیشی چیف ایڈوائزر کو دورہ پاکستان کی دعوت دی ۔اس موقع پر وفد سربراہ نے پرتپاک خیر مقدم پر وزیراعظم کا شکریہ ادا کرتے ہوئے کہا کہ پاکستان اور بنگلہ دیش کے درمیان برادرانہ تعلقات تاریخی روابط اور مشترکہ مذہب سے جڑے ہوئے ہیں۔
ڈاکٹر خالد حسین نے وزیراعظم کو چیف ایڈوائزر اور حکومت کی جانب سے بنگلہ دیش کے دورے کی دعوت دی اور پروفیر محمد یونس کا خط حوالے کیا جس میں پاکستان میں سیلاب سے جانی و مالی نقصان پر تعزیت کا اظہار اور امداد کی پیشکش کی گئی ہے ۔
