کراچی: وزیراعلی سندھ مراد علی شاہ نے واضح کیا ہے کہ پیپلز پارٹی کسی متنازع منصوبے کاحصہ نہیں بنے گی، بارش کے بعد برساتی مینڈک نکل کر افواہیں پھیلا رہے ہیں، لسانی و سیاسی تفریق پیدا کرنے کی کوشش نہ کی جائے، قوم پہلے ہی بھاری قیمت ادا کر چکی ہے، فی الوقت اولین ترجیحانسانی جانوں کو محفوظ بنانا اور بیراجوں و بندوں کو بچانا ہے۔
بانی پاکستان کے یوم وفات پر مزار قائد پر میڈیا سے گفتگو کرتے ہوئے مراد علی شاہ نے کہا کہ پاکستان کا قیام قائداعظم محمد علی جناح کی انتھک جدوجہد کا نتیجہ ہے اور اب وقت آ گیا ہے کہ ان کے اصول ایمان، اتحاد اور قربانی کو اپنا کر ملک کو حقیقی اسلامی فلاحی ریاست بنایا جائے۔
انہوں نے سابق وزرائے اعظم ذوالفقار علی بھٹو اور بینظیر بھٹو کو خراجِ عقیدت پیش کرتے ہوئے کہا کہ دونوں رہنمائوں نے ملک کے دفاع و ایٹمی پروگرام کیلئے لازوال کردار ادا کیا۔ انہوں نے کہا کہ بھارت کی حالیہ جارحیت پر مسلح افواج اور عوام نے یکجہتی سے جواب دیا، یہی اتحاد ہماری اصل طاقت ہے۔
انہوں نے کشمیری عوام پر بھارتی مظالم اور فلسطین میں اسرائیلی جارحیت کی مذمت کرتے ہوئے کہا کہ معصوم بچوں اور شہریوں پر بمباری کرنے والا اسرائیل مسلم دنیا کی یکجہتی کے باعث ضرور ناکام ہوگا۔ایک سوال پر انہوں نے کہا کہ سیلاب سے کئی علاقے متاثر ہوئے ہیں، اس وقت ہماری اولین ترجیح انسانی جانوں کو محفوظ بنانا اور بیراجوں و بندوں کو بچانا ہے۔
انہوں نے کچے کے علاقوں میں رہنے والوں سے جانی نقصان سے بچنے کیلئے حکومتی ہدایات پر عمل کی اپیل کی ۔ انہوں نے بتایا کہ پارٹی چیئرمین بلاول بھٹو کی ہدایت پر ریلیف سرگرمیاں شروع کر دی گئی ہیں، زرعی اور ماحولیاتی ایمرجنسی نافذ کی جا رہی ہے ،عالمی سطح پر امداد کے حصول کیلئے فلیش اپیل بھی کی جائے گی۔
اربن فلڈنگ بارے سوال کے جواب میں مراد علی شاہ نے کہا کہ بارش کے بعد کئی برساتی مینڈک سامنے آ گئے ہیں جو بے بنیاد افواہیں پھیلا رہے ہیں، ایسے عناصر لسانی اور سیاسی تفریق پیدا کرنے کی کوشش نہ کریں کیونکہ قوم پہلے ہی اس کی بھاری قیمت ادا کر چکی ہے۔
انہوں نے کہا کہ انتظامیہ اور عوامی نمائندے بارش اور سیلاب کے دوران سڑکوں پر موجود رہے اور اپنی ذمہ داریاں ادا کرتے رہے، بعض کوتاہیاں سامنے آئیں مگر ان پر قابو پانے کی کوشش جاری ہے۔انہوں نے واضح کیا کہ پیپلز پارٹی کسی غیر متنازع منصوبے کی حمایت نہیں کرے گی۔
