لاہور: سینئر اداکارہ نشو بیگم نے پاکستان فلم انڈسٹری کے معروف اداکار وحید مراد کو یاد کرتے ہوئے کہاہے کہ لیجنڈری اداکار وحید مراد سیٹ پر سب کے ساتھ شرارتیں کیا کرتے تھے، کئی بار ا مجھے اتنا تنگ کرتے کہ میں رو بھی دیا کرتی تھیں۔
ایک پوڈ کاسٹ میں گفتگو کرتے ہوئے انہوں نے کہا ایک مرتبہ فلم کی شوٹنگ کے دوران جب میںخراب موڈ کے ساتھ سیٹ پر آئیں تو وحید مراد نے میرا دوپٹہ اوڑھ کر میری نقل اتاری اور مجھے ہنسنے پر مجبور کردیا۔
نشو بیگم نے کہا کہ وحید مراد پاک و ہند کے وہ ہیرو تھے جو آج بھی بے حد مقبول ہیں، ان کے چاہنے والے آج بھی موجود ہیں، جو ان سے محبت کرتے ہیں اور ان کی نقل کرتے ہیں۔
نشو بیگم کے مطابق وحید مراد ایک بڑے برانڈ کی حیثیت رکھتے تھے کیونکہ ان کا اسٹائل منفرد تھا، بڑی بڑی آنکھیں، لباس پہننے کا انداز اور بولنے کا طریقہ سب ہی دلکش تھا، وہ جب کبھی بھی کسی لڑکی کی آنکھوں میں دیکھتے تھے تو وہ ضرور ان سے متاثر ہوتی تھی۔
اداکارہ نے مزید بتایا کہ وحید مراد سیٹ پر انہیں اکثر تنگ کرتے تھے، کبھی کھانا چھپا دیتے، کبھی ان کی وگ کے ساتھ مذاق کرتے جس پر وہ رو بھی دیا کرتیں، لیکن سب کو ان کی یہ شرارتیں بہت مزے دیتی تھیں۔
نشو بیگم نے کہا کہ ایک موقع پر انہوں نے اسپاٹ بوائے وحید کو ڈانٹ کر وحید مراد سے بدلہ لینے کی کوشش کی، اگلے دن وحید مراد ایک لڑکی کو سیٹ پر لے آئے جس کا نام بھی نشو تھا اور سب کے سامنے اس لڑکی کو ڈانٹنا شروع کردیا، یہاں تک کہ وہ رونے لگ گئیں، اس پر وحید مراد نے کہا کہ اب اصل بدلہ پورا ہوا۔ انہوں نے کہا کہ وحید مراد کی یہی شرارتیں کبھی مجھے تنگ کرتیں اور کبھی ہنسنے پر مجبور کردیتی تھیں، کئی بار وہ یہ بھی سوچتیں کہ دوبارہ ان کے ساتھ کام نہیں کریں گی لیکن وحید مراد ہمیشہ انہیں راضی کرلیا کرتے تھے۔
