لاہور: پی ڈی ایم اے نے آئندہ 24 گھنٹوں میںمزید طوفانی بارشوں کی پیشگوئی کرتے ہوئے بتایا ہے کہ پنجاب کے 2308موضع جات ، 15لاکھ 16 ہزار افراد سیلاب سے متاثر ہوئے ہیں، اب تک 4لاکھ 81ہزار افراد جبکہ 4 لاکھ 5 ہزار جانوروں کو محفوظ مقامات پر منتقل کیا گیا ہے، متاثرہ شہریوں اور کسانوں کے نقصانات کا تخمینہ لگا کر ان کا ازالہ یقینی بنایا جائے گا۔
پی ڈی ایم اے پنجاب نے دریائے راوی، ستلج اور چناب میں سیلاب سے ہونے والے نقصانات کی تازہ رپورٹ جاری کر دی۔ ریلیف کمشنر پنجاب نبیل جاوید کے مطابق صوبے کے مختلف اضلاع میں سیلاب کے باعث اب تک 2308موضع جات متاثر ہوئے ہیں اور مجموعی طور پر 15لاکھ 16ہزار افراد متاثر ہوئے ہیں، ان میں سے 4لاکھ 81ہزار لوگوں کو ریسکیو کرکے محفوظ مقامات پر منتقل کیا گیا ہے۔ متاثرہ علاقوں میں 511ریلیف کیمپس، 351میڈیکل کیمپس اور 321ویٹرنری کیمپس قائم کیے گئے ہیں جہاں لوگوں اور مویشیوں کو بنیادی سہولیات فراہم کی جا رہی ہیں۔
اب تک 4لاکھ 5ہزار جانوروں کو بھی محفوظ مقامات پر منتقل کیا گیا ہے۔ انہوں نے بتایا کہ دریائے چناب میں مرالہ کے مقام پر پانی کا بہا ایک لاکھ گیارہ ہزار کیوسک، خانکی پر ایک لاکھ 70ہزار کیوسک، قادرآباد پر ایک لاکھ 71ہزار کیوسک اور ہیڈ تریموں پر ایک لاکھ 46ہزار کیوسک ریکارڈ کیا گیا ہے۔
دریائے راوی میں جسڑ کے مقام پر پانی کا بہا 78ہزار کیوسک، شادرہ پر ایک لاکھ 38ہزار کیوسک ہے جہاں پانی میں کمی آ رہی ہے، بلوکی پر ایک لاکھ 99ہزار کیوسک ہے اور یہاں بہائو میں اضافہ ہو رہا ہے۔ ہیڈ سدھنائی پر پانی کی آمد 32ہزار اور اخراج 18ہزار کیوسک ہے۔
دریائے ستلج میں گنڈا سنگھ والا کے مقام پر پانی کا بہائو تین لاکھ 3ہزار کیوسک ہے اور یہاں اضافہ ہو رہا ہے جبکہ سلیمانی کی پر بہائو ایک لاکھ 38ہزار کیوسک ریکارڈ کیا گیا ہے۔ انہوں نے بتایا کہ منگلا ڈیم 80فیصد اور تربیلا ڈیم 100فیصد تک بھر چکا ہے ۔ بھارت کی جانب سے دریائے ستلج پر موجود بھاکڑا ڈیم 84فیصد، پونگ ڈیم 94فیصد اور تھین ڈیم 92فیصد بھرنے کی اطلاعات ہیں۔
انہوں نے بتایا کہ سیلاب کے باعث اب تک 30شہری جاں بحق ہو چکے ہیں جبکہ لاہور میں آسمانی بجلی گرنے سے دو افراد کی ہلاکت رپورٹ ہوئی ہے۔ ترجمان کے مطابق گزشتہ 24گھنٹوں میں پنجاب کے کئی اضلاع میں بارشیں ہوئیں۔
منڈی بہاالدین میں 81ملی میٹر، حافظ آباد میں 63ملی میٹر، جہلم میں 50ملی میٹر، سیالکوٹ میں 47ملی میٹر، بہاولنگر میں 44ملی میٹر، گجرات میں 34ملی میٹر، فیصل آباد میں 32ملی میٹر اور شیخوپورہ میں 31ملی میٹر ،لاہور میں 26ملی میٹر، چکوال میں 18ملی میٹر، گوجرانوالہ میں 14ملی میٹر، خانیوال میں 12ملی میٹر اور جھنگ میں 10ملی میٹر بارش ریکارڈ کی گئی جبکہ دیگر شہروں میں بھی ہلکی سے درمیانی بارش ہوئی ہے۔
پی ڈی ایم اے کے مطابق آئندہ 24گھنٹوں میں بھی پنجاب کے بیشتر اضلاع میں بارش کا امکان ہے اور مون سون بارشوں کا نواں سپیل 2ستمبر تک جاری رہے گا۔ ریلیف کمشنر نے بتایا کہ وزیر اعلی پنجاب کی ہدایت پر متاثرہ شہریوں اور کسانوں کے نقصانات کا تخمینہ لگا کر ان کا ازالہ یقینی بنایا جائے گا۔
