لاہور: پاکستانی شوبز انڈسٹری کے ابھرتے اداکار و ماڈل خاقان شاہنواز نے کہا ہے کہ پاکستان اور بھارت کی اصل جنگ ایک دوسرے سے نہیں بلکہ غربت کے ساتھ ہے اور آنے والے دنوں میں موسمیاتی تبدیلی کے خلاف ہوگی۔
فوٹوز اینڈ ویڈیوز شیئرنگ پلیٹ فارم انسٹاگرام پر اداکار نے ویڈیو پیغام میں کہا کہ چند ماہ قبل پاکستان اور بھارت کی جنگ کے دوران دونوں ممالک میمز بنا رہے تھے۔
بھارت والے کہہ رہے تھے ہم پاکستان کا پانی روک لیں گے تم لوگ نہاؤ گئے کیسے؟ ادھر پاکستانی کہہ رہے تھے مون سون آنے دو بھارت سے پانی کے ساتھ اور بھی بہت کچھ آئے گا۔
خاقان شاہنواز نے مزید کہا کہ پھر وہی ہوا مون سون آیا، اتنی تباہی ہوئی کہ دونوں ممالک کو لینے کے دینے پڑ گئے۔ انہوں نے مشورہ دیتے ہوئے کہ بجائے اس کے ہم ایک دوسرے کے خلاف میمز بنائیں، ایک دوسرے کے مذہب یا ملک کے خلاف باتیں کریں، مل کر بیٹھیں اور موسمیاتی تبدیلی کا حل نکالیں، نہیں تو برس بعد نہ بھارت باقی رہے گا نہ پاکستان صرف میمز باقی رہیں گے انٹرنیٹ پر۔
