پشاور: پشاور ہائیکورٹ نے الیکشن کمیشن کو زرتاج گل کے خلاف مزید کارروائی سے روکتے ہوئے فریقین سے جواب طلب کرلیا۔ منگل کو پشاور ہائیکورٹ میں جسٹس وقار احمد اور جسٹس اعجاز خان پر مشتمل دو رکنی بینچ نے رہنماء پی ٹی آئی زرتاج گل کی نااہلی کے خلاف درخواست پر سماعت کی۔
درخواست گزار کے وکیل نے موقف اپنایا کہ انسداد دہشت گردی عدالت فیصل آباد نے زرتاج گل کو 10 سال قید کی سزا سنائی، 5اگست کو الیکشن کمیشن نے دیگر ممبران کے ساتھ درخواست گزار کو بھی نااہل قرار دیا۔ جسٹس وقار احمد نے درخواست گزار کے وکیل سے سوال کیا کہ آپ لاہور ہائی کورٹ کیوں نہیں گئے؟۔
وکیل نے موقف اپنایا کہ عمر ایوب اور شبلی فراز کی اس طرح کی درخواستیں یہاں پر زیر سماعت ہیں، عمر ایوب اور شبلی فراز کو بھی اسی کیس میں نااہل کیا گیا۔
جسٹس وقار احمد نے کہا کہ دیگر درخواستوں کے ساتھ اس کو بھی سنیں گے نیزکیس کے دائرہ اختیار پر بھی آپ کو سنیں گے۔
بعد ازاں عدالت نے الیکشن کمیشن کو زرتاج گل کیخلاف مزید کاررائی سے روکتے ہوئے فریقین سے جواب طلب کرتے ہوئے سماعت ملتوی کردی۔
