اسلام آباد: سپریم کورٹ نے نجی کمپنی کے شیئرز اور بورڈ الیکشن مقدمے میں فریقین سے مکمل تفصیلات طلب کرتے ہوئے ریمارکس دیئے ہیں کہ کیس چلنے سے روکنے کی کوشش کی گئی، راستے سے ہی کیس کی فائلیں چوری ہوگئیں، پتا نہیں ہم پاکستان کا کیا امیج بنا رہے ہیں۔
منگل کو سپریم کورٹ میں جسٹس حسن اظہر رضوی کی سربراہی میں جسٹس میاں گل حسن اورنگزیب اور جسٹس نعیم اختر افغان پر مشتمل 3 رکنی بینچ نے نجی کمپنی کے حصص کی خرید و فروخت اور بورڈ آف ڈائریکٹرز کے الیکشن سے متعلق مقدمے پرسماعت کی۔
وکیل احسن بھون نے کہا کہ سینکڑوں صفحات پر مشتمل متفرق درخواست دائر کی ہے۔ جسٹس نعیم اختر افغان نے کہا کیا یہ وہی کیس ہے جس میں کمپنی کے ڈائریکٹر کو امریکہ میں ہراسانی ثابت ہونے پر نکالا گیا، اس نوعیت کا ایک کیس تو میرے بینچ میں آچکا ہے۔
جسٹس نعیم اختر افغان نے کہا کہ سندھ ہائی کورٹ میں تو ہراسانی ثابت ہونے کے بعد گوروں کیخلاف کارروائی کا کیس چلایا گیا، عدالتی کارروائی میں تھائی لینڈ اور امریکہ کے گوروں کو ذاتی حیثیت میں طلب کرنے کے احکامات جاری کئے گئے۔ انہوں نے استفسار کیا کہ کیا امریکہ اور تھائی لینڈ میں مقیم گوروں کیخلاف کارروائی چلانے کیلئے سندھ ہائیکورٹ میں مقدمہ دائر کرنے والے یہ وہی صاحب ہیں، پتا نہیں ہم پاکستان کا کیا امیج بنا رہے ہیں، وکلا نے جواب دیا کہ جی یہ وہی صاحب ہیں۔
جسٹس نعیم اختر افغان نے پوچھا کہ کیا ضیا الدین چشتی اس وقت کمرہ عدالت میں موجود ہیں، ان کا دیدار تو کروائیں۔ جسٹس نعیم اختر افغان نے ریمارکس دیئے کہ سپریم کورٹ میں زیر التوا تمام مقدمات کو یکجا کر لیتے ہیں، تمام مقدمات یکجا ہونے سے نیک نیتی اور بدنیتی کو سمجھنے میں مدد ملے گی، سپریم کورٹ میں بھی کیس چلنے سے روکنے کیلئے کوشش کی گئی، راستے سے ہی کیس کی فائلیں چوری ہو گئیں۔
وکیل شہزاد شوکت نے کہا کہ چوری نہیں بلکہ ڈکیتی ہوئی۔ جسٹس میاں گل حسن اورنگزیب نے کہا کہ کمپنی کے شیئرز کی مکمل تفصیل تحریری صورت میں جمع کرائیں۔بعد ازاں کیس کی سماعت تین ہفتوں تک کیلئے ملتوی کردی گئی۔
