کراچی: کراچی پولیس نے عصمت دری کے بعد بھابھی کو قتل کر کے نعش پھندے سے لٹکانے والے دیور کو گرفتار کرلیا۔ پولیس کے مطابق ایک روز قبل ملیر کینٹ تھانے کے علاقے حاجی زکریہ گوٹھ میں مکان سے30سالہ خاتون سعدیہ دختر ہدایت اللہ کی گلے میں پھندا لگی لاش ملی تھی جس کا مقدمہ بھائی محمد اسحاق کی مدعیت میں سسرالیوں دیور اسحاق، ساس اللہ رکھی ،دیورانی کوثر،رشید اور چھوٹے بھائی عادل کے خلاف ملیرکینٹ تھانے میں درج کیا گیا۔
مدعی مقدمہ کے مطابق24اگست کو بہن اپنے 5بچوں اورساس کے ہمراہ ہمارے گھر تقریب میں آئی تھی جس کے بعد وہ اپنے بچوں اورساس کے ہمراہ واپس شوہرکے گھرچلی گئی تھی ،پیر کو مجھے بذریعہ فون اطلاع ملی کہ بہن نے خود کشی کرلی ہے۔
اطلاع پربہن کے گھرپہنچا توکمرے میں چارپائی پراس کی لاش رکھی ہوئی تھی اور بہن کے گلے میں پھندے اورناک وماتھے پرزخم کے نشانات بھی تھے جبکہ اس کے سسرال والے اس کی قبراورتدفین کی تیاری کررہے تھے جس پر میں نے شور شرابہ کیا اورمدد گار15 پولیس کو اطلاع دی۔
پولیس کے آنے پر بہن کی لاش قانونی کارروائی کیلئے جناح ہسپتال لے جائی گئی اور پوسٹمارٹم کے بعد نعش حوالے کردی گئی۔ مدعی مقدمہ نے دعوی کیا کہ میری بہن کواس کے سسرالوں نے ذاتی رنجش کے باعث تشدد کا نشانہ بنانے کے بعد گلا دبا کر قتل کیا ہے۔
پولیس حکام نے بتایا کہ پوسٹمارٹم رپورٹ کے مطابق مقتولہ کوزیادتی کا نشانہ بنانے کے بعد گلا دبا کرقتل کیا گیا۔ حکام کے مطابق شک گزرنے پر دیوراسحاق کوگرفتار کیا گیا جس نے اعتراف جرم کرتے ہوئے بتایا کہ مقتولہ کو زیادتی کا نشانہ بنانے کے بعد گلا دبا کر قتل کیا۔
