لاہور: وفاقی وزیر منصوبہ بندی احسن اقبال نے مصنوعی ذہانت کو موجودہ دور کی ضرورت قرار دیتے ہوئے کہاہے کہ بدلتے رجحانات سے ہم آہنگی ضروری ہے،پائیدار ترقی کیلئے سب کو مل کر کام کرنا ہوگا۔
لاہور میں تقریب سے خطاب کرتے ہوئے احسن اقبال نے کہا کہ عوام کی خدمت ہمارا اولین فرض ہے، مسائل کو ترجیحی بنیادوں پر حل کرنا ضروری ہے۔
انہوں نے کہا کہ 2018ء میں آنے والی تبدیلی نے ملک کو شدید نقصان پہنچایا، ملک میں ترقی کا پہیہ روکا گیا، گزشتہ دور میں موسمیاتی تبدیلی سے نمٹنے کیلئے کوئی اقدامات نہیں کئے گئے۔ انہوں نے بتایا کہ ہم ملک کو جدید خطوط پر لے کر چل رہے ہیں، اڑان پاکستان پروگرام ترقی وخوشحالی کا ضامن ہے۔
انہوں نے کہا کہ نظام میں بہتری کیلئے اے آئی کا استعمال بڑھ رہا ہے، مصنوعی ذہانت آج کے دور کی ضرورت بن چکی ہے، بدلتے رجحانات سے ہم آہنگ ہونا بہت ضروری ہے۔انہوں نے سیاسی استحکام کو ملک کی ترقی کا راستہ قرار دیتے ہوئے کہا کہ پائیدار ترقی کیلئے سب کو مل کر کام کرنا ہوگا۔
