لاہور: وزیر اعلیٰ پنجاب مریم نواز نے مون سون بارشوں کے ممکنہ آٹھویں سپیل کے پیش نظر لاہور، راولپنڈی، ملتان، بہاولپور، ڈیرہ غازی خان، سرگودھا، گجرات اور گوجرانوالہ کے اضلاع میں پیشگی انتظامات کا حکم دیتے ہوئے کہا ہے کہ پی ڈی ایم اے پنجاب کے پیشگی الرٹس، ایس او پیز اور ہدایات پر عملدرآمد یقینی بنایا جائے۔
مریم نواز شریف نے متاثرہ علاقوں کے مکینوں کو ایس ایم ایس مسیج بھیج کر آگاہ کرنے کی ہدایت کی اور سیلاب متاثرین کے علاج و معالجہ کے لئے کلینک آن ویل اور فیلڈ ہسپتال متعین کرنے کا حکم دیا۔
وزیراعلی مریم نواز شریف نے کمشنرز اور ڈپٹی کمشنرز کو الرٹ رہنے کا حکم دے دیا اور سیلابی صورتحال سے نمٹنے کے لئے امدادی ٹیموں کو بروقت متاثرہ علاقوں میں متعین کرنے اور آبادی کے بروقت انخلا کے لئے مساجد اور لاڈ سپیکرز پر اعلانات کرنے کی ہدایت کی۔
مریم نواز شریف نے دریائے ستلج سے ملحقہ علاقوں میں ریسکیو، انتظامیہ، پولیس اور دیگر محکموں کو ضروری اقدامات اور دریاں کے پارٹ میں مقیم آبادیوں کا فوری انخلا یقینی بنانے کی ہدایت کی۔
وزیراعلی نے مال مویشی کی بروقت منتقلی کے لئے پیشگی اقدامات کا حکم دیا، وزیراعلی مریم نواز شریف کی ہدایت پر زراعت، آبپاشی، ہیلتھ، جنگلات، لائیوسٹاک، لوکل گورنمنٹ اور محکمہ ٹرانسپورٹ الرٹ ہیں۔
وزیراعلی پنجاب نے متاثرہ علاقوں میں مویشیوں کی ویکسی نیشن اور علاج معالجہ کی سہولت فراہم کرنے، پی ڈی ایم اے پنجاب انتظامیہ اور اداروں کو دریائے جہلم، چناب، راوی اور ستلج سے ملحقہ علاقوں میں خصوصی انتظامات کی ہدایت کی۔
