ممبئی: بالی وڈ اداکارہ پوجا بیدی نے کہا ہے کہ میری والدہ بھارت کی کلاسیکل ڈانسر پروتیما بیدی 50 سال کی عمر سے قبل ہی اس دنیا سے چلی گئیں، کاش میں ان کے ساتھ تھوڑا وقت اور گزار لیتی، والدہ ایک ایسی عورت تھیں جنہوں نے اپنی زندگی اپنے اصولوں کے عین مطابق گزاری، ان کی موت بھی ان کی خواہش کے عین مطابق ہی ہوئی۔
ایک انٹرویو میں انہوں نے کہا کہ اداکارہ کے مطابق والدہ کہتی تھیں کہ میں فطرت کے درمیان ہی مرنا چاہتی ہوں، میں نہیں چاہتی کہ میری خوبصورت زندگی کے اختتام پر مجھے کسی شمشان گھاٹ میں دھکیل دیا جائے جہاں میری راکھ کو گنگا میں بہادیا جائے، یہ ان کے لیے ایک شاندار اختتام تھا، ان کی لاش کبھی نہیں ملی اور وہ کائنات کا، زمین کا حصہ بن گئیں۔
اداکارہ نے مزید بتایا کہ کولو منالی جانے سے پہلے والدہ میرے پاس آئی تھیں، انہوں نے اپنی وصیت لکھنے کے بعد اپنے زیورات ، جائیداد کے کاغذات سب کچھ میرے حوالے کردیے تھے، والدہ کے مجھے حوالے کیے گئے سامان میں ان کا 12 صفحات پر مشتمل ایک خط بھی ملا جس میں انہوں نے مجھ سے اپنے بچپن سے لے کر جوانی اور شادی تک ہر لمحات کو شیئر کیا تھا۔
واضح رہے کہ پوجا بیدی کی والدہ پروتیما ایک بھارتی ماڈل و ڈانسر تھیں ، ان کی شادی 1969 میں بالی وڈ اداکار کبیر بیدی سے ہوئی، جوڑے کے دو بچے پوجا بیدی اور سدھارتھ بیدی تھے جس کے بعد جوڑے کے درمیان 1974 میں علیحدگی ہوگئی۔
پروتیما بیدی 1998 میں کیلاش مانسروور کی یاترا کے دوران لینڈ سلائیڈنگ کے دوران ہلاک ہوگئی تھیں۔ وہ کولو منالی گئی تھیں لیکن اس کے بعد وہ کبھی واپس نہیں آسکیں، ان کی لاش بھی کبھی نہ مل سکی۔
