اسلام آباد: ایشیائی ترقیاتی بینک نے ریکو ڈک منصوبے کیلئے 41 کروڑ ڈالر فنڈنگ پیکیج کی منظوری دیدی۔
جاری اعلاممئے کے مطابق ریکوڈک منصوبہ دنیا کے سب سے بڑے غیر استعمال شدہ معدنی ذخائر میں سے ایک ہے جسے بیرک گولڈ آپریٹ کرے گا، فنڈنگ میں 2قرضے شامل ہیں، جن کی مالیت 300ملین ڈالر ہے جبکہ 110ملین ڈالر کی مالی ضمانت حکومت پاکستان کیلئے دی جائے گی۔
اعلامئے کے مطابق ریکو ڈک منصوبے سے 2028ء کے بعد تانبا اور سونا حاصل ہونا شروع ہوگا جس سے تقریبا 70ارب ڈالر کا فری کیش فلو پیدا ہوگا، منصوبے کی مجموعی لاگت 6.6 ارب ڈالر ہے جس میں 50 فیصد حصہ بیرک گولڈ جبکہ بقیہ وفاقی و صوبائی حکومتوں کے پاس ہے۔
بیان میں کہا گیا ہے کہ پاکستان کو امید ہے کہ یہ منصوبہ معدنی شعبے میں مزید غیر ملکی سرمایہ کاری کیلئے سنگ میل ثابت ہوگا۔ منصوبے میں امریکہ سمیت دیگر ممالک کی کمپنیاں دلچسپی ظاہر کر چکی ہیں۔
منصوبے کے پہلے مرحلے میں سالانہ 2لاکھ میٹرک ٹن تانبا پیدا کرنے کا ہدف ہے جو توسیع کے بعد 4لاکھ ٹن تک بڑھایا جائے گا۔ بیان کے مطابق مزید اپ گریڈ اور نئی دریافتیں کرنے سے منصوبے کی عمر 37 سال سے زائد بھی ہو سکتی ہے۔
