پشاور: خیبر پختونخوا میں بارشوں اور سیلاب کے باعث 393 افراد جاں بحق،190زخمی ہوگئے۔
پی ڈی ایم اے خیبرپختونخوا کی جانب سے جاری جانی ومالی نقصانات کی رپورٹ کے مطابق جاں بحق افراد میں 300مرد، 53 خواتین اور 40 بچے شامل ہیں جبکہ زخمیوں میں 145مرد، 27خواتین اور 18بچے شامل ہیں۔
رپورٹ کے مطابق بارشوں اور فلش فلڈ سے مجموعی طور پر 1618گھروں کو نقصان پہنچا، جس میں 1185گھروں کو جزوی اور 433گھر مکمل منہدم ہوئے۔رپورٹ کے مطابق سیلاب سے زیادہ متاثرہ ضلع بونیر میں اب تک مجموعی طور پر 234افراد جبکہ صوابی میں 42افراد جاں بحق ہوئے ہیںجبکہ سوات، بونیر، باجوڑ، مانسہرہ، شانگلہ، دیر لویر اور بٹگرام، صوابی میں بھی مختلف حادثات پیش آئے ہیں۔
ترجمان نے متاثرہ اضلاع کی انتظامیہ کو امدادی سرگرمیاں تیز کرنے اور متاثرین کو فوری معاونت فراہم کرنے کی ہدایت کرتے ہوئے کہا ہے کہ پی ڈی ایم اے کا ایمرجنسی آپریشن سینٹر مکمل طور پر فعال ہے، عوام کسی بھی نا خوشگوار واقعے کی اطلاع، موسمی صورتحال سے آگاہی اور معلومات کیلئے فری ہیلپ لائن 1700پر رابطہ کریں۔ترجمان نے عوام کو ہدایت کی ہے کہ وہ ندی نالوں کے قریب جانے اور غیر ضروری سفر سے گریز کریں۔
