لاہور: سینئر اداکارہ شائستہ جبین نے کہا ہے کہ ڈراما سیریل آغوش میں میرے کردار کے انتخاب کے وقت کئی بڑے نام زیرِ غور تھے، میری خوبصورتی نے مجھے کردار حاصل کرنے میں نمایاں سہولت دی۔
ٹی وی پرو گرام میں گفتگو کرتے ہوئے شائستہ جبین نے بتایا کہ ڈراما سیریل آغوش کی کاسٹنگ کے وقت پروڈیوسر نے مجھے دیکھ کر کہا کہ یہ تو بہت کم عمر ہیں، یہ کردار ان کے لیے کیسے موزوں ہوگا کیونکہ ڈرامے میں انہیں ایک ایسی خاتون کا کردار ادا کرنا تھا جو چار بچوں کی ماں تھی اور عمر میں بھی بڑی تھی اور اس کردار کے لیے کئی بڑے بڑے نام زیرِ غور تھے۔
انہوں نے کہا کہ ہدایتکار نے مجھے پہلے نہیں دیکھا تھا بلکہ کسی نے میرے بارے میں بتایا تھا، اس لیے ہدایتکار نے دیکھتے ہی مسترد کردیا، جس پر مجھے بہت برا لگا کیونکہ میں ڈرامے کے سلسلے میں لاہور سے اسلام آباد گئی تھیں لیکن وہاں جا کر مجھے انکار کردیا گیا۔
تاہم بعد میں پروڈیوسر نے مجھے کہا کہ آپ پرفارم کرکے دکھائیں، میری پرفارمنس اور خوبصورتی دیکھ کر پروڈیوسر متاثر ہوئے اور مجھے وہ کردار مل گیا، جس کے بعد پہلے مجھے ٹیلی فلم میں کام دیا گیا اور پھر ڈرامے میں کردار ادا کرنے کا موقع ملا۔
شائستہ جبین نے کہا کہ میراشوبز میں کام کرنے کا کوئی ارادہ نہیں تھا، وہ اتفاقیہ طور پر اس فیلڈ میں آئیں اور ان کے گھر والے آج تک یہ قبول نہیں کرپائے کہ وہ شوبز میں کام کرتی ہیں۔ انہوں نے بتایا کہ کالج کے زمانے میں بھی اداکاری کی پیشکش ہوئی تھی لیکن انہوں نے یہ کہہ کر انکار کردیا کہ پتہ نہیں گھر سے اجازت ملے یا نہیں، تاہم بعد میں بڑی مشکل سے انہوں نے ایک ڈرامے میں کام کیا۔
اداکارہ کے مطابق جب ان کے ڈرامے کی پہلی قسط نشر ہوئی تو گھر میں بہت جھگڑا ہوا، اس شعبے میں آنے پر سب نے کہا کہ یہ کیا تماشا ہے، اسی وجہ سے انہوں نے شروعات میں بہت کم کام کیا اور تعلیم مکمل ہونے کے بعد ہی باقاعدہ اداکاری کا آغاز کیا۔
