لندن: نائب وزیراعظم و وزیر خارجہ اسحق ڈار نے برطانیہ کے پارلیمانی انڈر سیکریٹری آف اسٹیٹ برائے مشرق وسطی، افغانستان اور پاکستان، ہیمرش فالکنر سے ملاقات کی جس میں خطے کی صورتحال اور عالمی امور پر بھی تبادلہ خیال کیا گیا۔
دفتر خارجہ کے مطابق یہ ملاقات لندن میں برطانیہ کے وزارتِ خارجہ، دولتِ مشترکہ و ترقیاتی امور (ایف سی ڈی او ) میں ہوئی۔ ملاقات کے دوران دونوں فریقین نے دوطرفہ تعلقات کے تمام پہلوں کا جائزہ لیا اور سیاسی، معاشی، ماحولیاتی اور عوامی سطح پر روابط سمیت مختلف شعبوں میں تعاون کو مزید گہرا کرنے کے عزم کا اعادہ کیا۔
دونوں رہنماوں نے پاکستان اور برطانیہ کے تعلقات کی مثبت پیش رفت کو سراہا اور باہمی دلچسپی کے شعبوں میں جاری تعاون پر اطمینان کا اظہار کیا۔انہوں نے اس بات پر بھی زور دیا کہ اعلی سطحی روابط کا تسلسل جاری رکھا جائے تاکہ موجودہ رفتار کو آگے بڑھایا جا سکے اور اسٹریٹجک تعاون کے نئے مواقع تلاش کیے جا سکیں۔
نائب وزیراعظم و وزیر خارجہ نے پاکستان کے اقتصادی اصلاحات کے عزم کو اجاگر کیا اور خطے کی صورت حال پر پاکستان کا موقف پیش کیا، جس میں جنوبی ایشیا میں امن و استحکام شامل ہے۔
انہوں نے جموں و کشمیر کے تنازعے کے منصفانہ اور پرامن حل کی ضرورت پر زور دیا، جو متعلقہ اقوام متحدہ سلامتی کونسل کی قراردادوں کے مطابق ہو۔
