کوئٹہ: بلوچستان حکومت نے سیلاب گلگت بلتستان اور خیبرپختونخوا کے سیلاب متاثرین کیلئے امدادی سامان کی بڑی کھیپ روانہ کردی۔
ترجمان بلوچستان حکومت شاہد رند اور ڈی جی پی ڈی ایم اے جہانزیب خان کے مطابق بلوچستان حکومت کی جانب سے 1500 من گلگت بلتستان اور 1000من خیبر پختونخوا کے متاثرہ خاندانوں کیلئے امدادی سامان بھیجا گیا۔امدادی سامان میں نان فوڈ آئٹمز جیسے خیمے، کمبل، پانی کی بوتلیں، اور دیگر ضروری اشیا شامل ہیں۔
شاہد رند نے کہا کہ بلوچستان حکومت مشکل کی اس گھڑی میں گلگت بلتستان اور خیبر پختونخوا کے عوام کے ساتھ کھڑی ہے اور سیلاب متاثرین کی مدد کرنا بلوچستان حکومت کی انسانی ہمدردی اور یکجہتی کا عملی اظہار ہے۔
انہوں نے کہا کہ امدادی سامان متاثرہ خاندانوں کی فوری ضروریات کو مدنظر رکھتے ہوئے اعلی معیار کا ہے جبکہ جہانزیب خان نے کہا کہ بلوچستان حکومت نے متاثرین کیلئے معیاری اور جانچ شدہ ریلیف سامان بھیجا ہے تاکہ اس کی افادیت اور معیار یقینی بنایا جا سکے۔ انہوں نے کہا کہ امدادی کھیپ میں شامل اشیاء متاثرہ خاندانوں کی ضروریات کے مطابق منتخب کی گئی ہیں۔
