لودھراں: لودھراں ریلوے سٹیشن کے قریب پشاور سے کراچی جانے والی عوام ایکسپریس کی 5 بوگیاں پٹری سے اتر کر الٹ گئیں جس کے نتیجے میں ایک مسافر جاں بحق اور متعدد زخمی ہو گئے،حادثے کے باعث اپ اور ڈان ریلوے ٹریک بند ہوگئے، متعدد ٹرینیں تاخیر کا شکار ہوگئیں۔
ریسکیو حکام کے مطابق جاں بحق ہونے والے مسافر کی شناخت وقاص کے نام سے ہوئی ہے جو خوشاب کا رہائشی تھا۔ حادثے کے بعد بوگیوں میں پھنسے افراد کو نکالنے کیلئے ریسکیو ٹیموں نے فوری کارروائی کی، جبکہ زخمیوں کو فوری طور پر لودھراں ڈسٹرکٹ ہسپتال منتقل کیا گیا ہے، جہاں متعدد زخمیوں کی حالت تشویشناک بتائی جا رہی ہے۔
ڈپٹی کمشنر ڈاکٹر لبنی نذیر کی ہدایت پر اسسٹنٹ کمشنر ارم شہزادی نے ڈی ایچ کیو ہسپتال میں ٹرین حادثے کے زخمی مسافروں کی عیادت اور انہیں ناشتہ بھی فراہم کیا، لودھراں ٹرین کے مسافروں کے آرام کیلئے میونسپل سٹیڈیم میں انتظامات مکمل کر دیئے گئے، لودھراں ڈپٹی کمشنر نے جائے حادثہ پر ریسکیو آپریشن کی نگرانی کی۔
