لاہور: وزیراعلی پنجاب مریم نواز نے ترقیاتی منصوبوںکی بروقت تکمیل یقینی بنانے ،پینے کے صاف پانی کی فراہمی، واٹر فلٹریشن پلانٹس کی تعمیر، مرمت و بحالی کیلئے سسٹم وضع کرنے کی ہدایت کردی۔
جمعہ کو وزیراعلی مریم نواز کی زیر صدارت خصوصی اجلاس کا انعقاد ہوا جس میں صاف پانی کی فراہمی، واٹر فلٹریشن پلانٹس، مثالی گائوں پراجیکٹ اور دیگر ترقیاتی امور کا تفصیلی جائزہ لیا گیا۔اجلاس میں وزیراعلی کو مثالی گائوں پراجیکٹ کے بارے میں بریفنگ دی گئی جبکہ لاہور ڈویلپمنٹ اور پنجاب ڈویلپمنٹ پراجیکٹس پر پیشرفت کا جائزہ بھی لیا گیا۔
اجلاس میں دور دراز علاقوں میں واٹر پمپ لگانے کی تجویز پر غور کیا گیا۔اجلاس کو بتایا گیا کہ لاہور ڈویژن میں 51، راولپنڈی میں 64، فیصل آباد میں 37، ملتان میں 75، سرگودھا میں 45، گوجرانوالہ میں 64، ڈیرہ غازی خان میں 51، بہاولپور میں 61، گجرات میں 53اور ساہیوال میں 49بیوٹیفکیشن منصوبے مکمل کیے جائیں گے۔
وزیراعلی نے واٹر فلٹریشن پلانٹس کے حوالے سے 30جون 2026ء کی ڈیڈ لائن مقرر کرتے ہوئے کہا کہ ان منصوبوں کی بروقت تکمیل یقینی بنائی جائے۔
وزیراعلی نے لاہور ڈویلپمنٹ پراجیکٹ میں سڑکوں کی تعمیر و مرمت جلد مکمل کرنے کی ہدایت دی اور بعض منصوبوں میں تاخیر پر ناپسندیدگی کا اظہار کیا۔وزیراعلی نے ترقیاتی منصوبوں کی ٹائم لائن اور تعمیراتی معیار کو ہر صورت مد نظر رکھنے کی ہدایت کرتے ہوئے کہا کہ پینے کے پانی کی عدم دستیابی کی عوامی شکایات کا ازالہ کیا جائے، واٹر فلٹریشن پلانٹس کی تعمیر، مرمت و بحالی کیلئے باقاعدہ سسٹم وضع کیا جائے ۔
