صدر آصف زرداری نے پاکستان اور آذر بائیجان کے درمیان تجارت، معیشت و علاقائی رابطہ کاری کو فروغ دینے کی ضرورت پر زور دیا ہے۔ جاری بیان کے مطابق بدھ کو صدر مملکت سے آذربائیجان کے سفیر خازر فرہادوف نے ملاقات کی جس میں برادرانہ تعلقات کو دونوں ممالک کے مفاد میں مزید مستحکم کر نے پر زور دیا گیا۔ صدر مملکت نے کہا کہ دونوں ممالک کے درمیان تجارت، معیشت اور علاقائی رابطہ کاری کو فروغ دینے کی ضرورت ہے، براہ راست فضائی روابط سے تجارتی و عوامی تعلقات کے نئے مواقع پیدا ہوں گے ۔ صدر نے سفیر کو آذربائیجان اور آرمینیا کے تاریخی امن معاہدے پر مبارکباد دیتے ہوئے کہا کہ پاکستان تنازعات کے حل کیلئے بات چیت اور پرامن ذرائع پر یقین رکھتا ہے،امن معاہدہ خطے میں دیرپا استحکام اور خوشحالی کی ضمانت ہے۔
