لاہور: پاکستان کی معروف لوک گلوکارہ صنم ماروی نے کہا ہے کہ میوزک کی وجہ سے مجھے سوشل میڈیا پر بہت ٹرولنگ کا سامنا کرنا پڑتا ہے، میں بھی عام انسانوں کی طرح ہوں، میرا بھی دل چاہتا ہے کہ عبادات کروں لیکن لوگ اس بات کو نہیں سمجھتے۔
ایک پروگرام میں گفتگو کرتے ہوئے گلوکارہ کا کہنا تھا کہ زیادہ تر لوگ مجھے گلوکاری کی وجہ سے عبادتیں کرنے پر تنقید کا نشانہ بناتے ہیں، میری پوسٹوں پر نامناسب جملے کستے ہیں، اگر میں عمرے، حج یا زیارات پر جاتی ہوں تو لوگ کمنٹس کرتے ہیں اب آپ بھی عمرہ یا حج کریں گی؟۔
گلوکارہ نے کہا کہ گلوکاری میرا کام ہے، روزی روٹی ہے، یہ تو کرنا ہی ہے۔ انہوں نے کہا جب میں کربلا میں زیارت کرنے جاتی ہوں تو بھی صارفین طعنے دیتے ہیں، کربلا کی زیارت کرکے واپس آنے اور عمرے کی ادائیگی کے بعد دوبارہ کام پر واپس جاوں تو طعنے ملتے ہیں کہ ابھی تو عمرہ کرکے آئی تھیں اب پھر یہ کام کررہی ہے۔
