کراچی: سندھ حکومت نے 13 اگست کے میوزیکل شو کی تیاریوں کو حتمی شکل دے دی، شرکاء کیلئے 27 ہزار نشستیں مختص کردی گئیں ۔ جبکہ وزیر اطلاعات سندھ شرجیل میمن نے کہا ہے کہ 13 اگست گرینڈ شو سندھ حکومت کا عوام کیلئے آزادی کا تحفہ، چاہتے ہیں شہری محفوظ، خوشگوار اور یادگار شام گزاریں۔
پیر کو وزیر شرجیل میمن کی زیر صدارت ڈپٹی کمشنر ایسٹ کے دفتر میں اجلاس ہوا جس میں وزیر بلدیات سعید غنی، میئر کراچی مرتضی وہاب، کمشنر کراچی، ایڈیشنل آئی جی کراچی، سیکریٹری اطلاعات اور دیگر حکام نے شرکت کی ۔ اجلاس میں جشن آزادی تقریب کے سلسلے میں 13 اگست کو میوزیکل شو کی تیاریوں اور انتظامات کا جائزہ لیا گیا۔
ڈپٹی کمشنر ایسٹ نے بریفنگ میں بتایا کہ شرکاء کیلئے 27ہزار نشستوں کی گنجائش ہوگی جن میں سے 10ہزار نشستیں فیملیز کیلئے مختص ہوں گی، خصوصی بچوں کیلئے تین بسیں مختص ہوں گی اور انہیں خصوصی انٹری پاسز دیے جائیں گے تاکہ ان کو براہِ راست نشستوں تک پہنچایا جا سکے۔سکیورٹی افسران نے بتایا کہ سٹیڈیم میں دو حفاظتی سکیورٹی لئیرز ہوں گی، سکیورٹی پلان میں رینجرز اور پولیس کے ساتھ ساتھ سکائوٹس کی تعیناتی کی تجویز بھی دی گئی ہے۔
شرجیل میمن نے کہا کہ 13 اگست کو ہونے والا گرینڈ شو عوام کیلئے سندھ حکومت کی جانب سے یوم آزادی کا ایک تحفہ ہے،ہم چاہتے ہیں کہ کراچی کے شہری اور دیگر شرکا ایک محفوظ، خوشگوار اور یادگار شام گزاریں اور اپنے وطن کی سالگرہ جوش و جذبے کے ساتھ منائیں۔
انہوں نے ہدایت کی کہ خصوصی بچوں کیلئے خاص انتظامات کئے جائیں تاکہ انہیں براہِ راست نشستوں تک پہنچایا جا سکے، پیپلز پارٹی کی قیادت، وزیر اعلی سندھ اور ہم ذاتی طور پر چاہتے ہیں کہ خصوصی بچے خاص طور پر اس جشن کا حصہ بنیں۔انہوں نے کہا کہ سیکیورٹی کے تمام تقاضے سختی سے پورے کئے جائیں، رینجرز کی زیادہ سے زیادہ نفری تعینات کی جائے تاکہ عوام پرامن ماحول میں جشن آزادی کی تقریبات سے لطف اندوز ہو سکیں۔
