لاہور: چیئرمین پاکستان کرکٹ بورڈ محسن نقوی نے کہا ہے کہ سابق ٹیسٹ کرکٹر حنیف محمد ناصرف ایک عظیم بیٹسمین تھے بلکہ ایک اعلی شخصیت کے مالک بھی تھے، حنیف محمد کی ٹرپل سنچری کا ریکارڈ آج بھی شائقین کرکٹ نہیں بھولے۔
پیر کو حنیف محمد کی نویں برسی پر اپنے پیغام میںمحسن نقوی نے کہا کہ حنیف محمد کی عمدہ بلے بازی کا ہر کوئی مداح تھا، کرکٹ آج بھی اس عظیم بیٹسمین کو نہیں بھولی اور نہ بھول سکے گی، حنیف محمد نے کرکٹ کے کھیل میں پاکستان کا نام روشن کیا۔
چیئرمین پی سی بی نے مزید کہا کہ حنیف محمد جیسے بلے باز ایک عرصے کے بعد پیدا ہوتے ہیں، پاکستان کرکٹ بورڈ اپنے ہیروز کی خدمات کا برملا اعتراف کرتا ہے، پاکستان کرکٹ کے لئے حنیف محمد کی بے مثال خدمات کو ہمیشہ یاد رکھا جائے گا۔
