اسلام آباد: وفاقی وزیر پارلیمانی امور ڈاکٹر طارق فضل چوہدری نے کہا ہے کہ پارلیمان ہی عوام کی آواز ہے اور اسی کے ذریعے تمام مسائل کا حل ممکن ہے، 10 اگست 1947 کو پہلی دستور ساز اسمبلی کا قیام بانی قائداعظم محمد علی جناح کی جمہوری سوچ کی عکاسی کرتا ہے۔
پاکستان کی دستور ساز اسمبلی کی 78 ویں سالگرہ کے موقع پر اپنے پیغام میں انہو نے زور دے کر کہا کہ آج کی اپوزیشن کو بھی دیگر قومی مسائل پر دیگر سیاسی جماعتوں کے ساتھ بیٹھ کر جمہوریت اور پارلیمان کا مضبوط کرنا چاہیے۔
انہوں نے مزید کہا کہ معیشت، دفاع، تعلیم اور صحت سمیت تمام شعبے مضبوط ہوں گے اگر اپوزیشن مثبت تنقید کرتے ہوئے قومی مسائل کے حل کے لئے حکومت کے ساتھ بیٹھے۔ وفاقی وزیر نے مزید کہا کہ ہمیشہ سیاسی ڈائیلاگ کے فقدان کی وجہ سے جمہوریت کو مسائل رہے، خوشی ہے کہ پیپلزپارٹی اور مسلم لیگ ن نے ماضی کی غلطیوں سے سبق سیکھ کر میثاقِ جمہوریت پر اتفاق کیا۔
ڈاکٹر طارق فضل چوہدری نے مزید کہا کہ آج پی ٹی آئی کو بھی یہی مشورہ دوں گا ان کے تمام مسائل کا حل پارلیمان کے پاس ہے اور یہ صرف سیاسی ڈائیلاگ کے ذریعے ہی ممکن ہے۔
