لاہور: وزیراعلی پنجاب مریم نواز نے پاک امریکہ تعلقات کو جامع اور عوامی مفاد پر مبنی شراکت داری میں بدلنے کے عزم کا اظہار کرتے ہوئے کہا ہے کہ دونوں ممالک کے درمیان تجارتی حجم میں اضافہ خوش آئند، تعلق آزمودہ، بااعتماد اور پائیدار شراکت داری کی مثال ہے۔
جمعرات کو مریم نواز سے لاہور میں تعینات نئے امریکی قونصل جنرل اسٹیٹسن سینڈرز نے ملاقات کی جس میں باہمی دلچسپی کے امور، تجارتی تعلقات، توانائی تعاون، ٹیکنالوجی، زراعت اور تعلیمی تبادلوں پر تفصیلی تبادلہ خیال کیا گیا، وزیراعلی نے اسٹیٹسن سینڈرز کو عہدہ سنبھالنے پر مبارکباد دیتے ہوئے امریکی صدر کی جانب سے پاکستان اور بھارت کے درمیان ثالثی کی کوششوں کو سراہا۔
مریم نوازنے کہا کہ امریکہ پاکستان کا سب سے بڑا تجارتی شراکت دار اور قابل اعتماد اقتصادی پارٹنر ہے،کئی دہائیوں پر محیط پاک امریکہ تعلقات قابل اعتماد، مستحکم اور دور رس شراکت داری کی بنیاد پر قائم ہیں۔ انہوں نے کہا کہ عوامی رابطوں، تجارتی تعاون اور مشترکہ مفادات نے پاک امریکہ پارٹنرشپ کو مزید مضبوط کیا ہے، 2024 میں پاکستان اور امریکہ کے درمیان تجارتی حجم میں اضافہ خوش آئند امر ہے۔
انہوں نے کہا کہ پاکستانی نژاد امریکی برادری دونوں ممالک کے درمیان عوامی روابط کی مضبوط کڑی ہے، اپریل 2025ء میں امریکی کانگریشنل پاکستان کاکس سے بھی ملاقات کر چکی ہوں۔ انہوں نے بتایا کہ پنجاب پاکستان کی زرعی ریڑھ کی ہڈی ہے، پنجاب حکومت واٹرایفیشنٹ فارمنگ، پریسیژن ایگریکلچراور کولڈ چین انفرااسٹرکچر کی ترقی کو ترجیح دے رہی ہے، امریکی ایگریکلچر ٹیکنالوجی کمپنیاں پنجاب میں سرمایہ کاری کے بے شمار مواقع سے فائدہ اٹھا سکتی ہیں۔
انہوں نے بتایا کہ پنجاب میں ہر سال 20ہزار سے زائد آئی ٹی گریجویٹس فارغ التحصیل ہو رہے ہیں۔انہوںنے بتایا کہ پنجاب میں جدید ترین ٹیکنالوجی سے لیس نئی الیکٹرک ٹرین متعارف کرائی جا رہی ہے، اپنی چھت اپنا گھر کے تحت چند ماہ کے قلیل عرصے میں پبلک سیکٹر ہاسنگ میں قابل تقلید مثال قائم کی ہے۔انہوں نے کہا کہ پاک امریکہ تعلق کو جامع، سٹریٹجک اورعوامی مفاد پر مبنی پارٹنرشپ میں تبدیل کرنے کیلئے پرعزم ہیں۔
