اسلام آباد: وفاقی وزیر تجارت جام کمال نے غیر روایتی برآمدات کے فروغ کے عزم کا اظہار کرتے ہوئے قیمتی پتھروں کے شعبے کو عالمی فورمز میں نمائندگی دینے کی ہدایت کی ہے۔
جاری بیان کے مطابق جام کمال کی زیر صدارت منعقدہ اجلاس میں قیمتی پتھروں اور زیورات کے شعبے کی ترقی، برآمدات میں اضافے اور عالمی منڈیوں میں رسائی سے متعلق امور پر غور کیا گیا۔ اجلاس سے خطاب کرتے ہوئے وفاقی وزیر نے کہا کہ حکومت غیر روایتی برآمدات کے فروغ کیلئے مکمل طور پر پرعزم ہے ،قیمتی پتھروں و زیورات کا شعبہ اس برآمداتی حکمت عملی میں کلیدی کردار ادا کر سکتا ہے۔
انہوں نے یقین دہانی کرائی کہ وزارت تجارت اس شعبے کو مکمل تعاون فراہم کرے گی۔ انہوں نے کہا کہ وزارت کی جانب سے مرتب کی جانے والی سفارشات جلد وزیراعظم آفس کو ارسال کی جائیں گی تاکہ پالیسی سطح پر درکار اقدامات کو بروقت یقینی بنایا جا سکے۔اجلاس میں ایس آر او 760کی بحالی اور ایس آر او 924سے ممکنہ استثنیٰ پر بھی غور کیا گیا۔
وزیر تجارت نے ہدایت دی کہ اس شعبے کو بین الاقوامی بزنس فورمز میں بھرپور نمائندگی دی جائے خصوصا فرانس، بنگلہ دیش اور ایتھوپیا میں ہونے والے فورمز میں شرکت یقینی بنائی جائے۔وفاقی وزیر نے اس بات پر زور دیا کہ سرکاری و نجی شعبے کا اشتراکِ عمل قیمتی پتھروں کی صنعت کو نئی جہت فراہم کرے گا، حکومت اس شعبے کی مکمل استعداد سے فائدہ اٹھانے کیلئے تمام ممکنہ اقدامات کرے گی۔
انہوں نے کہا کہ دیہی ہنر مندوں اور خواتین کی اقتصادی شمولیت حکومت کی اولین ترجیحات میں شامل ہے، زیورات کے شعبے میں خواتین کی شرکت صنعت کو مضبوط بنیاد فراہم کر سکتی ہے۔
