پشاور: مشیر اطلاعات خیبر پختونخوا بیرسٹر سیف نے کہا ہے کہ بھارت کا کشمیر کو ہڑپنے کا خواب مٹی میں دفن ہوچکا، کشمیری آج بھی حق خودارادیت کیلئے پرعزم ہیں، پاکستان کو دبانے کی کوشش میں منہ توڑ جواب ملنے پر مودی دنیا سے منہ چھپاتا پھر رہا ہے، حق خود ارادیت کے حصول تک کشمیریوں کی حمایت جاری رکھیں گے۔
یوم استحصالِ کشمیر پر پشاور میں ریلی کا انعقاد کیا گیا جس میں مختلف مکاتب فکر کے افراد، سول سوسائٹی کے نمائندگان، طلبا اور شہریوں کی بڑی تعداد نے شرکت کی۔ شرکاء نے کشمیری عوام سے یکجہتی اور بھارتی اقدامات کے خلاف شدید نعرے بازی کی۔
ریلی سے خطاب کرتے ہوئے بیرسٹر سیف نے کہا ہے کہ آج ہم ایک عظیم مقصد اور کشمیری عوام سے یکجہتی کے اظہار کیلئے جمع ہوئے ہیں۔ انہوں نے کہا کہ بھارت نے آئینی ترامیم کے ذریعے مقبوضہ کشمیر کی خصوصی حیثیت ختم کی جو بین الاقوامی قوانین اور اقوامِ متحدہ کی قراردادوں کی صریح خلاف ورزی ہے۔
انہوں نے کہا ہے کہ بھارتی وزیر اعظم مودی نے یہ سوچا تھا کہ وہ آسانی سے کشمیر کو ہڑپ کر لے گا اور چند دنوں کے احتجاج کے بعد دنیا سب کچھ بھلا دے گی لیکن ایسا نہیں ہوا، کشمیری عوام آج بھی اپنے حق خودارادیت کیلئے پر عزم ہیں۔
انہوں نے کہا کہ مودی یاد رکھے ہم نے ماضی میں بھی غاصبوں کو مٹی میں دفن کیا ہے، بھارت نے پاکستان پر حملہ کیا اور ہمیں دبانے کی کوشش کی مگر ہم نے ایسا منہ توڑ جواب دیا کہ وہ آج بھی دنیا کے سامنے منہ چھپاتا پھر رہا ہے۔ انہوں نے کشمیری عوام کی قربانیوں کو خراج تحسین پیش کرتے ہوئے کہا کہ پاکستان حق خود ارادیت کے حصول تک ہر سطح پر کشمیریوں کی سیاسی، سفارتی اور اخلاقی حمایت جاری رکھے گا۔
