کراچی: وزیر ِاعلی سندھ مراد علی شاہ نے پولیس شہداء کو خراج عقیدت پیش کرتے ہوئے کہا ہے کہ صوبائی حکومت پولیس شہدا کی قربانیاں نہیں بھولی، پولیس شہدا پیکیج و مراعات میں اضافہ، ریٹائرڈ پولیس اہلکاروں کے بچوں کو سکالرشپ پروگرام میں توسیع دی ہے۔
یوم شہدائے پولیس پر جاری بیان میں مراد علی شاہ نے کہا کہ سندھ پولیس کے اہلکار صوبے میں قیام امن کیلئے اپنی جان کا نذرانہ پیش کر ررہے ہیں۔ انہوں نے بتایا کہ1971ء سے اب تک سندھ پولیس کے 2ہزار 549اہلکار شہید ہو چکے ہیں، شہدا میں 4ایس پی، 1اے ایس پی اور 22ڈی ایس پی بھی شامل ہیں۔
انہوں نے کہا کہ صوبائی حکومت پولیس شہدا کی قربانیوں کو بھولی نہیں ہے، ہم نے پولیس شہدا پیکیج اور مراعات میں اضافہ کیا ہے، شہید اہلکاروں کے ورثا کو 60سال کی عمر تک تنخواہ ادا کی جاتی ہے۔انہوں نے کہا کہ شہید کے خاندان کو 10 لاکھ کی ہیلتھ انشورنس اور سرکاری رہائش دی جائے گی، شہید اہلکاروں کے بچوں کیلئے سکالرشپس اور تعلیمی اداروں میں داخلہ کوٹا بھی مختص ہے۔
انہوں نے کہا کہ ریٹائرڈ پولیس اہلکاروں کے بچوں کو سکالرشپ پروگرام میں بھی توسیع دی ہے، دورانِ سروس وفات پر خاندان کو 6 سے 30لاکھ روپے دیے جائینگے۔ انہوں نے کہا کہ پولیس اہلکاروں کے بچوں کا علاج اور قانونی معاونت بھی سندھ حکومت ہی فراہم کرتی ہے۔
