راولپنڈی: اے این ایف نے 9کارروائیوں میں 2کروڑ 15لاکھ روپے سے زائد مالیت کی 107.318کلوگرام منشیات برآمد کر کے 11 ملزمان گرفتار کرلئے۔
ترجمان کے مطابق چکلالہ میں واقع کوریئر آفس میں برطانیہ سے راولپنڈی آنے والے پارسل کی چیکنگ کے دوران 84 گرام مائع بھنگ برآمد ہوئی، جس پر متعلقہ ملزم کو گرفتار کر لیا گیا۔ اسی طرح ساہیوال کے قریب ہڑپہ ٹول پلازہ پر ایک گاڑی سے 4کلو افیون، 2کلو چرس اور 500گرام آئس برآمد ہوئی، جہاں 3ملزمان کو حراست میں لیا گیا۔
پشین میں سرانان روڈ پر کارروائی کے دوران ایک گاڑی سے 45کلو افیون برآمد ہوئی، جبکہ ایک ملزم کو گرفتار کیا گیا۔ وفاقی دارالحکومت اسلام آباد میں ترنول کے قریب ایک ٹرک سے 25 کلو افیون اور 22.8 کلوگرام چرس برآمد کی گئی اور ایک شخص کو گرفتار کر لیا گیا۔پشاور میں رنگ روڈ کے قریب ایک گاڑی سے 1.3 کلو ہیروئن برآمد کی گئی اور اٹک کے برہان ٹول پلازہ پر بس میں سوار ایک مسافر کے قبضے سے 710گرام افیون برآمد ہوئی۔
ترجمان کے مطابق کوہاٹ کے قریب انڈس ہائی وے پر موٹر سائیکل سوار سے 2 کلو افیون برآمد ہوئی، جب کہ اسلام آباد موٹروے ٹول پلازہ پر ایک بس مسافر کے قبضے سے 2 کلو آئس اور دوسری کارروائی میں ایک اور مسافر کے بیگ سے 1.808کلوگرام ہیروئن برآمد ہوئی۔ترجمان کے مطابق گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات شروع کر دی گئی ہے۔
