پشاور: مشیر اطلاعات خیبر پختونخوا بیرسٹر سیف نے کہا ہے کہ جنگ میں شکست کے بعد بھارت اوچھے ہتھکنڈوں پر اتر آیا ہے، پاکستان کی فیٹف گرے لسٹ میں شمولیت کا بھارتی خواب کبھی شرمندہ تعبیر نہیں ہوگا۔ جاری بیان میں بیرسٹر سیف نے کہا کہ کلبھوشن یادیو پاکستان میں بھارتی جرائم کا واضح ثبوت ہے، بھارتی جاسوس کے جرائم کی طویل فہرست بھارت کو فیٹف کی گرے لسٹ میں شامل کرنے کی راہ ہموار کرتی ہے۔
انہوں نے کہا کہ خیبر پختونخوا میں بھارتی دہشت گردانہ سرگرمیوں کے واضح ثبوت موجود ہیں، بھارتی دہشت گردی کے تمام شواہد فیٹف حکام کو پیش کئے جائیں گے۔ انہوں نے کہا کہ جنگ میں شکست کے بعد بھارت اوچھے ہتھکنڈوں پر اتر آیا ہے، پاکستانی فوج سے شکست کے بعد اب دشمن پاکستان کو فیٹف کی گرے لسٹ میں شامل کرانے کے خواب دیکھ رہا ہے۔
انہوں نے کہا کہ علی امین گنڈاپور کا بیان توڑ مروڑ کر پاکستان کو فیٹف کی گرے لسٹ میں شامل کرانے کا بھارتی خواب کبھی پورا نہیں ہوگا۔
